එංගලන්තය හා ඕස්ට්‍රේලියාව අතර ඓතිහාසික අළු බඳුන තරගාවලියේ දෙවන තරගය කඩුලු 8කින් ජයගැනීමට අද ඕස්ට්‍රේලියාව සමත් වුණා. ඒ අනුව මෙම තරගාවලිය 2-0ක් ලෙස පෙරමුණ ගැනීමට ඕස්ට්‍රේලියාව සමත් වුණා.
බ්‍රිස්බේන් හී ගැබා ක්‍රීඩාංගනයේ පැවති මෙම දෙවන් ටෙස්ට් ක්‍රිකට් තරගයේ පළමුවෙන් පන්දුවට පහරදුන්නේ එංගලන්ත කණ්ඩායමයි.
සිය පළමු ඉනිම සඳහා එංගලන්ත කණ්ඩායම ලකුණු 334ක් ලබාගත්තා. එහිදී ජෝ රූට් සිය 40වන ටෙස්ට් ශතකය හා ඕස්ට්‍රේලියාවේදී ලබාගත් පළමු ටෙස්ට් ශතකය වාර්තා කරමින් නොදැවී ලකුණු 138ක් ලබාගත්තා. ආරම්භක පිතිකරු සැක් ක්‍රොව්ලි ලකුණු 76ක් හා අවසන් පිතිකරු වන ජොෆ්‍රා ආචර් වේගවත් ලකුණු 38ක් ලබාගත්තා.
පන්දු යැවීමේදී ඕස්ට්‍රේලියාව වෙනුවෙන් මිචෙල් ස්ටාර්ක් කඩුලු 6ක් හා මයිකල් නෙසර්, ස්කොට් බොලන්ඩ් හා බ්‍රෙන්ඩන් ඩගට් 1 කඩුල්ල බැගින් දවාගත්තා.
ඊට පිලිතුරු වශයෙන් ඕස්ට්‍රේලියානු කණ්ඩායම සිය පළමු ඉනිමට ලකුණු 511ක් රැස්කළා. ජේක් වෙදරල්ඩ් ලකුණු 72ක්, මානස් ලබුෂේන් ලකුණු 65ක්, ස්ටීවන් ස්මිත් ලකුණු 61ක්, ඇලෙක්ස් කැරී ලකුණු 63ක් හා මිචෙල් ස්ටාර්ක් ලකුණු 77ක් ලබාගත්තා.
පන්දු යැවිමේදී එංගලන්තය වෙනුවෙන් බ්‍රයිඩන් කාස් කඩුලු 4ක් හා බෙන් ස්ටෝක් කඩුලු 3ක් ලබාගත් අතර ජොෆ්‍රා ආචර්, ගස් ඇට්කින්සන් හා විල් ජැක්ස් 1 කඩුල්ල බැගින් දවාගත්තා.
ඒ අනුව එංගලන්තය සිය දෙවනි ඉනිම ආරම්භ කරනු ලැබුවේ ලකුණු 177ක් පසුපසින් සිටිමිනුයි. එංගලන්ත දෙවනි ඉනිම ලකුණු 241ට සීමාකිරීමට ඕස්ට්‍රේලියානු පන්දු යවන්නන් සමත්වුණා. එංගලන්ත දෙවනි ඉනිමේ පළමු කඩුලු 6ම තුන්වන් දිනයේ අවසන් සැසියේදී දවාගැනීමට් ඕස්ට්‍රේලියාව සමත් වුණා.
එංගලන්ත දෙවනි ඉනිමේ හත්වන කඩුල්ල සඳහා බෙන් ස්ටෝක් හා විල් ජැක්ස් පන්දු 221කදී ලකුණු 96ක ඉවසිලිවන්ත සබදතාවයක් ගොඩනැගුවද ඕස්ට්‍රේලියාවට අභියෝගයක් එල්ල කිරීමට එය ප්‍රමාණවත් වූයේ නැත. බෙන් ස්ටෝක් පන්දු 152ට ලකුණු 50ක් හා විල් ජැක්ස් පන්දු 92ට ලකුණු 41ද ලබාගත්තා.
විශිෂ්ට පන්දු යැවීමක නිරත වෙමින් මයිකල් නෙසර් කඩුලු 5ක් ද, මිචෙල් ස්ටාර්ක් හා ස්කොට් බොලන්ඩ් කඩුලු 2 බැගින් දවාගත්තා.
තරගයේ ජයග්‍රහණය සඳහා ඕස්ට්‍රේලියාවට අවශ්‍යය වූයේ ලකුණු 65ක් පමණයි. පන්දුවාර 10ක් අවසානයේදී කඩුලු 2ක් දැවී ලකුණු 69ක් ලබාගෙන මෙම තරගයද ජයගැනීමට ඕස්ට්‍රේලියාව සමත්වුණා. ස්ටීව් ස්මිත් පන්දු 9ට ලකුණු 23යි. ගස් ඇට්කින්සන් කඩුලු 2ක් දවාගත්තා.
මේ ජයග්‍රහණයත් සමග තරග 5කින් සමන්විත අළු බඳුන තරගාවලිය 2-0ක් ලෙස ඕස්ට්‍රේලියාව පෙරමුණ ගත්තා. තරගාවලියේ තුන්වන තරගය 17 වනදා ඇඩිලේඩ් හීදී ආරම්භ වීමට නියමිතයි. තරගයේ වීරයා ලෙස නම් වූයේ කඩුලු 8ක් දවාගත් මිචෙල් ස්ටාර්ක්.
