2026 20/20 ලෝක කුසලානයේ අවසන් පූර්ව වටයේ පළමු තරගය අද සවස 7ට ඊඩ්න් ගාඩ්න් පිටියේදී පැවැත්වීමට නියමිතයි. තරගය පැවැත්වෙන්නේ දකුණු අප්‍රිකාව හා නවසීලන්තය අතරයි.
මෙම කණ්ඩායම් දෙකම මේ වන තුරු ලෝක කුසලානයක් ජයග්‍රහණය කර නොමැති අතර දකුණු අප්‍රිකාව 2024 වසරේ අවසන් මහා තරගයට සුදුසුකම් ලබා අනුශූරයන් බවට පත්වුණා.
දකුණු අප්‍රිකාව මෙවර ලෝක කුසලානයේ තමන් තරග කළ සියලු තරග ඉන්දියාවේ ක්‍රීඩා කළ අතර කිසිදු තරගයක් පරාජය වූයේ ද නැත.
දකුණු අප්‍රිකානු කණ්ඩායමේ නායක ඒඩ්න් මාක්‍රම් ඉතා හොදින් ලකුණු අතර සිටින අතර නවසීලන්ත ආරම්භක පිතිකරුවන් වන ටිම් සයිෆර්ට් හා ෆින් ඇලන් ද ලකුණු අතර සිටිනවා.
කෙසේ වෙතත් නවසීලන්ත මැද පෙළට වඩා දකුණු අප්‍රිකානු මැද පෙල පිතිකරුවන් වන, ඩෙවාල්ඩ් බ්‍රෙවිස්, ඩේවිඩ් මිලර් ට්‍රිස්ටන් ස්ටබ්ස් ලකුණු අතර සිටිනවා.
නවසීලන්ත වේග පන්දු යවන ක්‍රීඩක මැට් හෙන්රි සිය දෙවන දරුවාගේ උපත සඳහා සහභාගී වී නැවතත් කණ්ඩායම හා එක් වී තිබෙනවා.
දකුණු අප්‍රිකාව හා නවසීලන්තය විස්සයි විස්ස ලෝක කුසලාන වලදී තරග 5ක් ක්‍රීඩා කොට ඇති අතර එම තරග 5ම ජයගෙන ඇත්තේ දකුණු අප්‍රිකාවයි.
එසේම මෙම කණ්ඩායම් දෙක අවසන් පූර්ව වටයේ තරගයකදී හමුවන පළමු අවස්තාව මෙයයි.
