ශ්‍රී ලංකා – බටහිර ඉන්දීය කොදෙව් කාන්තා කණ්ඩායම් අතර පැවති දෙවැනි 20-20 ක්‍රිකට් තරගය කඩුලු 4 කින් ජය ගැනීමට ශ්‍රී ලංකා කණ්ඩායම ඊයේ සමත් වුණා. තරගය පැවැත්වුණේ, බටහිර ඉන්දීය කොදෙව් හිදී.
කාසියේ වාසිය හිමි කර ගත් ශ්‍රී ලංකා කණ්ඩායම පළමුවෙන් පන්දුවට පහරදීමේ අවස්ථාව කොදෙව් කණ්ඩායමට ලබා දුන්නා.
ඒ අනුව, ඔවුන් පන්දුවාර 20 තුළ සියලුදෙනා දැවී ලකුණු 101 ක් රැස් කළා. නායිකා හෙලී මැතිව්ස් ලකුණු 28 යි. පන්දු යැවීමේදී මල්කි මදාරා සහ නිලක්ෂිකා සිල්වා කඩුලු 3 බැගින් බිඳහෙලුවා.
පිළිතුරු ඉනිම ක්‍රීඩා කළ ශ්‍රී ලංකා කණ්ඩායම පන්දුවාර 18 යි පන්දුවක් අවසානයේ කඩුලු 6 ක් දැවී ලකුණු 102 ක් රැස් කරමින් තරගය ජය ගත්තා. නායිකා චමරි අතපත්තු ලකුණු 39 යි. පන්දු යැවීමේදී අෆී ෆ්ලෙට්චර් සහ කුයිනා ජෝසප් කඩුලු 2 බැගින් දවා ගත්තා.
තරග තුනකින් සමන්විත තරගාවලියේ පළමු තරගය වර්ෂාව හේතුවෙන්, තීරණයකින් තොරව අවසන් වුණා. ඒ අනුව, මෙම ජයග්රීහණයත් සමගින් ශ්‍රී ලංකා කණ්ඩායම 1 ට බින්දුවක් ලෙස තරගාවලියේ පෙරමුණ ගෙන සිටිනවා.
