ශ්‍රී ලංකා රග්බි සංගමයේ ලියාපදිංචිය තාවකාලිකව අත්හිටුවමින් ක්‍රීඩා අමාත්‍ය සුනිල් කුමාර ගමගේ මහතා ගැසට් නිවේදනයක් නිකුත් කර තිබෙනවා.
මෙහි ඉදිරි කටයුතු සිදුකරගෙන යාම සඳහා ක්‍රියාකාරී කාර්ය බලකායක් පත්කර ඇති බවද නිකුත් කළ ගැසට් නිවේදනයේ වැඩිදුරටත් සඳහන්.
පසුගිය කාලයේ ශ්‍රී ලංකා රග්බි සංගමයේ පරිපාලනය සම්බන්ධයෙන් ගැටලුකාරී තත්වයක් මතුව තිබුණා. ඒ හේතුවෙන් නීතිමය පියවරද ගැණුනු අතර එයන් පසුබිමක් මත ශ්‍රී ලංකා රග්බි කණ්ඩායම ජාත්‍යන්තර රග්බි පිටියේදි ඉහළ දක්ෂතා ප්‍රදර්ශනය කළා.
ඒ අනුව ඔවුන් මේ වනවිට ආසියානු රග්බි ශූරතාවලියේ පළමු කාණ්ඩයේ රග්බි තරගාවලියටද සුදුසුකම් ලබා තිබෙනවා.
කෙසේ වෙතත් රග්බි සංගමයේ මතුව ඇති මෙම ගැටලුකාරි තත්වය හේතුවෙන් ශ්‍රී ලංකා රග්බි සංගමයේ ලියාපදිංචිය තාවකාලිකව අත්හිටුවීම සඳහා ක්‍රීඩා අමාත්‍ය සුනිල් කුමාර ගමගේ මහතා විසින් ගැසට් නිවේදනයක් නිකුත් කළා.
ක්‍රීඩා අමාත්‍යවරයාගේ අත්සනින් නිකුත් කළ එම නිවේදනයේ වැඩිදුරටත් දැක්වෙන්නේ ශ්‍රී ලංකා රග්බි සංගමය සඳහා සුදුසු බලධාරියෙකු වශයෙන් පත්කරන ලද ක්‍රීඩා සංවර්ධන දෙපාර්තමේන්තු අධ්‍යක්ෂ ආචාර්ය ශෙමාල් ප්‍රනාන්දු මහතාගේ පත්වීම වහාම බලපැවැත්වෙන පරිදි අවලංගු කරන බවයි.
