ඉන්දියාව හා නවසීලන්තය අතර එක්දින තරගාවලිය තරග 2-1ක් ලෙස ජයගැනීමට නවසීලන්ත කණ්ඩායම සමත්වුණා. ඒ ඊයේ පැවති තුන්වන එක්දින තරගය නවසීලන්ත ලකුණු 41කින් ජයගැනීමෙනි. මේ නවසීලන්ත කණ්ඩායම ඉන්දියාවේදී ලැබූ පළමු එක්දින තරගාවලි ජයග්‍රහණය ලෙස වාර්තා වුණා.
පිතිකරුවන්ගේ පාරාදීසයක් බඳු වූ ඉන්දෝර් ක්‍රීඩාංගණයේ කාසියේ වාසිය දිනූ ඉන්දීය නායකයා තීරනය කළේ පලමුවෙන් පන්දු රැකීමටයි. ඒ ලබාදෙන ඕනෑම ඉලක්කයක් හඹායෑමේ අදහසිනුයි.
ඒ ආරාධනයෙන් පළමුවෙන් පන්දුවට පහර කළ නවසීලන්ත කණ්ඩායම සිය ඉනිමට කඩුලු 8ට ලකුණු 337ක් ලබාගැනීමට සමත් වුණා.
නවසීලන්ත කණ්ඩායමේ මුල් කඩුලු 3 ලකුණු 58කට දැවී ගිය පසු පිටියට පිවිසි ග්ලෙන් ෆිලිප්ස් ඩැරල් මිචෙල් සමග සිව්වන කඩුල්ලට ලකුණු 219ක සබදතාවයක් ගොඩනැගීමට සමත් වුණා.
සිය 8වන ශතකය හා මේ තරගාවලියේ පිට පිට ලබාගත් දෙවන ශතකය වාර්තා කරමින් ඩැරල් මිචෙල් පන්දු 133ට ලකුණු 137ක් ලබාගත් අතර ග්ලෙන් ෆිලිප්ස් සිය දෙවන එක්දින ශතකය ලබාගනිමින් පන්දු 88ට ලකුණු 106ක් ලබාගත්තා.
ඉන්දියානු කණ්ඩායම වෙනුවෙන් අර්ශ්දීප් සිං ලකුණු 63ට කඩුලු 3ක් හා දැඩි ප්‍රහාරයකට ලක් වූවද හර්ෂිත් රානා ලකුණු 84ට කඩුලු 3ක් දවාගැනීමට සමත් වුණා.
පිලිතුරු ඉනිම ක්‍රීඩා කළ ඉන්දීය කණ්ඩායමේ පළමු කඩුලු 4ම ලකුණු 71ට දැවීගියා. ඉන්පසු හර්දික් පාණ්ඩියා හා අක්සාර් පටෙල්ගේ අඩුව පිරවීම සඳහා කණ්ඩායමට එකතු වූ නවක ක්‍රීඩක නිතිෂ් කුමාර් රෙඩ්ඩි දැවැන්ත පිතිකරු විරාත් කෝලි සමග එක්ව පස්වන කඩුල්ලට ලකුණු 88ක සබදතාවයක් ගොඩනැගීමට සමත්වුණා.
ඉන්පසු පිටියට පිවිසි රවීන්ද්‍ර ජඩේජා ද ඉක්මනින් දැවී ගිය පසු කෝලි එක් අන්තයක හුදකලා වෙමින් සිටියදී වේග පන්දු යවන ක්‍රීඩක හර්ශිත් රානා සිය මංගල එක්දින අර්ධ ශතකය වාර්තා කරමින් පන්දු 43කින් ලකුණු 52ක් ලබාගත්තා. ඒ අනුව ඉන්දීය කණ්ඩායමට නැවතත් තරගය ගැන බලාපොරොත්තු එක් කරමින් 7ත් වන කඩුල්ලට ලකුණු 99ක සබදතාවයක් ගොඩනැගීමට කෝලි සමග හර්ශිත් රානා සමත් වුණා.
කේසේ නමුත් රානා ගේ දැවී යාමෙන් පසුව හුදකලා ඉනිමක් දියත් කළ විරාත් කෝලි 9වන කඩුල්ල ලෙස ලකුණු 124ට දැවී ගියා. විරාත් කෝලි මේ ලබාගත්තේ සිය එක්දින තරග දිවියේ 54වන ශතකයයි. එසේම ඔහු හඹායන ඉනිම් වලදී ලබාගත් 29වන ශතකය වූ අතර ඔහු ශතකයක් ලබා හඹාගිය තරග වලින් පරාජයට පත් වූ 5ස් වන තරගයද මෙය ලෙස වාර්තා වුණා.
මේ අනුව නවසීලන්තය, පසුගිය ටෙස්ට් තරගාවලිය ඉන්දීය කණ්ඩායමට එරෙහිව ඉන්දියාවේදී ලැබූ පළමු ටෙස්ට් තරගාවලි ජය වූ අතර මේ ඉන්දියාවේ දී නවසීලන්තය ලැබූ පළමු එක්දින තරගාවලි ජයයි.
2-1ක් ලෙස නවසීලන්තය ජයගත් මෙම එක්දින තරගාවලියේ හා අවසන් තරගයේ වීරයා ලෙස පිට පිට ශතක දෙකක් වාර්තා කළ ඩැරල් මිචෙල් හට හිමි වුණා.
