ලෝක කුසලාන ක්‍රිකට් තරගාවලියේ සුපිරි කණ්ඩායම් 8 වටයට සුදුසුකම් ලබා ගැනීමට ශ්‍රී ලංකාව අද සමත් වුණ‌ා. ඒ ඔස්ට්‍රේලියාව කඩුලු 8 කින් පරාජය කරමින්. තරගය පැවැත්වුණේ පල්ලෙකැලේ අන්තර් ජාතික ක්‍රිකට් ක්‍රීඩාංගණයේදී.
කාසියේ වාසිය දිනා ගත් ශ්‍රී ලංකා කණ්ඩායමේ නායක දසුන් ශානක පළමුවෙන් පන්දුවට පහර දීමේ අවස්ථාව ඔස්ට්‍රේලියාවට ලබා දුන්නා.ඒ අනුව ඔස්ට්‍රේලියා ඉනිම ආරම්භ කලේ මිචෙල් මාෂ් සහ ට්‍රැවිස් හෙඩ්. ඔවුන් දෙදෙනා ආරම්භක කඩුල්ලට ලකුණු 104 ක සබධකාවක් ගොඩනැගුවා.
ට්‍රැවිස් හෙඩ් පන්දු 29 කදී ලකුණු 56 ක් රැස් කලේ 4 පහර 7 ක් සහ 6 පහර 3 ක් සමග.
කැමරන් ග්‍රීන් ලකුණු 3 කට දැවී ගියේ දෙවැනි කඩුල්ල ලෙසයි. නායක මිචෙල් මාෂ් ලකුණු 54 ක් රැස් කළා.
පන්දු 27 කදී ගොඩ නැගුණු ඔහුගේ ඉනිමට 4 පහර 8 ක් සහ 6 පහර 2 ක් ඇතුළත්. ග්ලේන් මැක්ස්වෙල් ලකුණු 22 ක් ලබා ගත් අතර ජොෂ් ඉංග්ලිෂ් ලකුණු 27 යි.
ඔස්ට්‍රේලියා කණ්ඩායමේ සෙසු කිසිදු පිතිකරුවෙකුට ලකුණු 10 සීමාව පසු කිරීමට හැකි වුණේ නැහැ.
ඒ අනුව ඔස්ට්‍රේලියා කණ්ඩායම පන්දුවාර 20 ඇතුළත සියලු ක්‍රීඩකයින් දැවී රැස් කළ ලකුණු සංඛ්‍යාව 181 ක්. ඔවුන්ගේ ඉනිමේ අවසන් කඩුලු 6 දැවී ගියේ ලකුණු 21 ක් තුළයි.
පන්දු යැවීමේදී දුශාන් හේමන්ත ලකුණු 37 කට කඩුලු 3 යි. දුශ්මන්ත චමීර කඩුලු 2 ක් දවා ගත්තා. මහීෂ් තීක්ෂන, දුනිත් වෙල්ලාලගේ සහ කමිදු මෙන්ඩිස් අතර කඩුලු 2 බැගින් බෙදී ගියා.
තරගය ජය ගැනීම සදහා ලකුණු 182 ක ඉලක්කයක් සමග ශ්‍රී ලංකා ඉනිම ආරම්භ කලේ පැතුම් නිස්සංක සහ කුසල් ජනිත් පෙරේරා. ඔවුන් දෙදෙනා ආරම්භක කඩුල්ලට ගොඩනැගූ සබධතාව ලකුණු 8 ක්. පළම කඩුල්ල ලෙස කුසල් ජනිත් එක් ලකුණකට දැවී ගියා.
කුසල් මෙන්ඩිස් අද වාර්තා කලේ තම 20-20 ක්‍රිකට් දිවියේ 20 වැනි අර්ධ ශතකයයි. ඔහු මෙවර ලෝක කුසලාන ක්‍රිකට් තරගාවලියේ අඛන්ඩව ලබා ගත් තුන්වැනි අර්ධ ශතකය මෙයයි. කුසල් මෙන්ඩිස් සහ පැතුම් නිස්සංක දෙවැනි කඩුල්ලට ලකුණු 97 ක සබධතාවයක් ගොඩ නැගුවා. දෙවැනි කඩුල්ල ලෙස කුසල් දැවී ගියේ ලකුණු 51 කට.
විශිෂ්ට ඉනිමක් ක්‍රීඩා කළ පැතුම් නිස්සංක අද වාර්තා කලේ තම 20 -20 ක්‍රිකට් දිවියේ දෙවැනි අර්ධ ශතකයයි.
ශ්‍රී ලංකා කණ්ඩායම පන්දු වාර 18 කදී කඩුලු 2 ක් දැවී ලකුණු 184 ක් රැස් කරමින් තරගයේ ජය වාර්තා කළා. පැතුම් නිස්සංක පන්දු 52 කදී නොදැවී ලකුණු 100 යි. ඔහුගේ ඉනිමට 4 පහර 10 ක් 6 පහර 5 ක් ඇතුලත්.
