ලෝක කුසලාන 20-20 ක්‍රිකට් තරගාවලියේ ඉදිරි තරග සඳහා වේග පන්දු යවන ක්‍රීඩක ඩිල්ෂාන් මධුශංක ශ්‍රී ලංකා කණ්ඩායමට කැඳවා තිබෙනවා. අන්තර්ජාතික ක්‍රිකට් කවුන්සිලයේ තරගාවලි තාක්ෂණික කමිටුව ඊට අනුමැතිය පළකළා.ඩිල්ෂාන් මධුශංක කණ්ඩායමට කැඳවා ඇත්තේ ඕස්ට්‍රේලියාව සමග පැවති තරගයේදි ආබාධයට ලක්වු වේග පන්දු යවන ක්‍රීඩක මතීෂ පතිරණ වෙනුවටයි.
මෙවර තරගාවලියේදි ශ්‍රි ලංකා කණ්ඩායමෙන් ඉවත් කෙරුණූ දෙවැනි ක්‍රීඩකයා වන්නේ මතීෂ පතිරණයි. මීට පෙර වනිදු හසරංගද ආබාධයක් හේතුවෙන් තරගාවලියෙන් ඉවත් කෙරුණා.
තරගාවලියේ මූලික වටයේ ශ්‍රී ලංකාව සහභාගිවන අවසන් තරගය හෙට පැවැත්වෙනවා. ඒ සිම්බාබ්වේ කණ්ඩායම සමගයි. තරගයට සූදානම් වන ශ්‍රී ලංකා ක්‍රීඩකයින් අද ආර් ප්‍රේමදාස ක්‍රීඩාංගණයේදි පුහුණුවීම්වල නිරත වුණා.
ශ්‍රී ලංකාව සහ සිම්බාබ්වේ කණ්ඩායම් මූලික වටය යටතේ බී කාණ්ඩයෙන් තරග වැදුණා.
ශ්‍රී ලංකාව එහිදී අයර්ලන්තය, ඕමානය සහ ඕස්ට්‍රේලියාව පරාජය කිරීමට සමත්වුණා. සිම්බාබ්වේ කණ්ඩායම මූලික වටයේදි ඕමානය, සහ ඕස්ට්‍රේලියාව පරාජය කළ අතර, අයර්ලන්තය සමගපැවති තරගය වර්ෂාව හේතුවෙන් අතහැර දැමුණා.
ශ්‍රී ලංකාව සහ සිම්බාබ්වේ අතර, අන්තර්ජාතික 20-20 තරග 11 ක් පවත්වා තිබෙනවා. ඉන් තරග 8 ක් ශ්‍රී ලංකාවත්, තරග 3 ක් සිම්බාබ්වේ කණ්ඩායමත් ජයගත්තා. 20-20 ලෝක කුසලානයකදි ශ්‍රී ලංකාව සහ සිම්බාබ්වේ අතර තරගයක් පැවැත්වෙන්නේ 2012 වසරෙන් පසුවයි.
ශ්‍රී ලංකා කණ්ඩායමේ ආරම්භ පිතිකරු පැතුම් නිස්සංක 20-20 පිතිකරුවන්ගේ ශ්‍රේණිගත කිරීම් අනුව 3 වැනි ස්ථානය දක්වා ඉදිරියට පැමිණ තිබෙනවා. ඔහු ලෝක කුසලානය ආරම්භයට පෙර එමලේඛනයේ 6 වැනි ස්ථානයේයි පසුවුණේ. ඕස්ට්‍රේලියාව සමග පැවති තරගයේදි පැතුම් ශතකයක් වාර්තා කළේ මෙවර ලෝක කුසලානයේ පළමු ශතකලාභියා වෙමින්.
