20-20 ලෝක කුසලාන ක්‍රිකට් තරගාවලියේ බංග්ලාදේශය සහභාගීවන සියලු තරග ශ්‍රී ලංකාවේදී පවත්වන්නැයි, බංග්ලාදේශ ක්‍රිකට් ආයතනය අන්තර්ජාතික ක්‍රිකට් කවුන්සිලයෙන් ඉල්ලීමක් කර ඇති බව, වාර්තා වනවා. තරගාවලියේ මූලික වටයේදී බංග්ලාදේශය තරග 4ක් ඉන්දියාවේදී ක්‍රීඩා කිරීමට නියමිතයි.
තරගාවලිය ශ්‍රී ලංකාවේදී සහ ඉන්දියාවේදී ලබන මස 7 වැනිදා ආරම්භ වනවා.
බංග්ලාදේශ ක්‍රිකට් ක්‍රීඩක මුස්තෆිසූර් රහමාන් ඉන්දීය ප්‍රිමියලීග් 20-20 ක්‍රිකට් තරගාවලියේ කොල්කටා නයිට් රයිඩර්ස් සංචිතයෙන් ඉවත් කරන ලෙස ඉන්දීය ක්‍රිකට් පාලක මණ්ඩලය පසුගියදා අදාල කණ්ඩායමේ කළමනාකාරීත්වයෙන් ඉල්ලීමක් කර තිබුණා.
ඒ අනුව, එම ක්‍රීඩකයා සංචිතයෙන් ඉවත් කිරීමටයි, කොල්කටා නයිට් රයිඩර්ස් කළමනාකාරීත්වය කටයුතු කර තිබුණේ.
බංග්ලාදේශ ක්‍රිකට් ආයතනය පවසන්නේ, වලංගු කොන්ත්‍රාත්තුවක් තිබියදීත් තම රටේ ක්‍රිකට් ක්‍රීඩකයෙකුට ඉන්දියාවේ ක්‍රීඩා කිරීමට නොහැකිනම් ලෝක කුසලානය ක්‍රීඩා කිරීම සඳහා ඉන්දියාවට යාම අනාරක්ෂිත බවයි.
එබැවින් ඉන්දියාවේදී මෙම තරග පැවැත්වීම සම්බන්ධයෙන් යම් ගැටලුකාරී තත්වයක් මතුව ඇති බවයි, විදෙස් මාධ්‍ය පවසන්නේ.
තරගාවලියේ මූලික වටය යටතේ බංග්ලාදේශය තරග 4ක් ක්‍රීඩා කිරීමට නියමිතයි. ඒ බටහිර ඉන්දීය කොදෙව්දේශය, ඉතාලිය, එංගලන්තය සහ නේපාලය සමගයි.
