දකුණු අප්‍රිකාව හා සිම්බාබ්වේ අතර පැවති තරග 2කින් සමන්විත වූ ටෙස්ට් තරගාවලිය 2-0ක් ලෙස ජයගැනීමට දකුණු අප්‍රිකාව සමත් වුණා. ඒ ඊයේ දින ලැබූ ඉනිමක හා ලකුණු 236ක ජයත් සමගින්.
මුලින්ම පන්දුවට පහරදුන් දකුණු අප්‍රිකානු කණ්ඩායම කඩුලු 5ක් දැවී ලකුණු 626ක් ලබා සිටියදී ඉනිම අත්හිටවූවා.
වාර්තාගත ඉනිමක් දියත් කළ නායක වියාන් මූල්ඩර් නොදැවී ලකුණු 367ක් ලබාගත් අතර, ඔහුට බ්‍රයන් ලාරාගේ ලකුණු 400 වාර්තාව බිඳහෙලීමට හැකියාව හා කාලය තිබුනත් එය ප්‍රතික්ෂේප කරමින් ඉනිම අත්හිටවීමට තීරණය කළා.
මූල්ඩර්ට අමතරව ඩේවිඩ් බෙඩින්හැම් ලකුණු 82ක් හා ප්‍රෙටෝරියස් ලකුණු 78ක් ලබාගත්තා.
පන්දු යැවීමේදී සිම්බාබ්වේ කණ්ඩායම වෙනුවෙන් ටනකා චිවන්ගා හා කුන්ඩායි මටිගිමු කඩුලු 2 බැගින් දවාගත්තා.
ඊට පිලිතුරු වශයෙන් සිම්බාබ්වේ කණ්ඩායමට සිය පළමු ඉනිමට ලබාගැනීමට හැකියාවක් ලැබුණේ සියලු දෙනා දැවී ලකුණු 170ක් පමණයි.
එම ඉනිමට සෝන් විලියම්ස් නොදැවී ලකුණු 83ක් ලබාගත් අතර පන්දු යැවීමේදී දකුණු අප්‍රිකාව වෙනුවෙන් ප්‍රිනෙලන් සුබ්‍රායෙන් කඩුලු 4ක් හා වියාන් මූල්ඩර් කඩුලු 2ක්, කෝඩි යුසූෆ් කඩුලු 2ක් දවාගත්තා.
නැවතත් සිය දෙවෙනි ඉනිම ආරම්භ කළ සිම්බාබ්වේ කණ්ඩායමට එහිදී ලබාගැනීමට හැකිවුණේ ලකුණු 220ක් පමණයි. නායක ක්‍රේග් අර්වින් ලකුණු 49යි. නික් වෙල්ෂ් ලකුණු 55යි.
කඩුලු ලබාගැනීමේදී කෝර්බින් බොස්ච් කඩුලු 4ක් හා සෙනුරන් මුතුසාමී කඩුලු 3ක් දවාගත්තා.
ඒ අනුව දකුණු අප්‍රිකානු කණ්ඩායම ඉනිමක හා ලකුණු 236ක ජයක් ලබමින් තරගාවලිය 2-0ක් ලෙස ජයගත්තා.
