සංචාරක එංගලන්ත කණ්ඩායම හා ශ්‍රී ලංකා කණ්ඩායම අතර පැවැත්වෙන තරග 3 කින් සමන්විත විස්සයි විස්ස තරගාවලියේ දෙවන තරගය ඩක්වර්ත් ලුවිස් න්‍යාය අනුව කඩුලු 6 කින් ජය ගැනීමට එංගලන්ත කණ්ඩායම සමත් වුණා.
ඒ අනුව, තරගයේ කාසියේ වාසිය දිනා ගත් එංගලන්ත කණ්ඩායම පළමුවෙන් පන්දුවට පහර දීමට ශ්‍රී ලංකා කණ්ඩායමට ආරාධනා කළ අතර ඔවුන් සිය පන්දුවාර 20 තුළ කඩුලු 5 ක් දැවී ලකුණු 189 ක් ලබා ගත්තා.
පන්දුවට පහර දීමේදී ශ්‍රී ලංකා කණ්ඩායම වෙනුවෙන් කමිල් මිෂාර ලකුණු 36 ක්, පැතුම් නිස්සංක ලකුණු 34 ක්, කුසල් මෙන්ඩිස් ලකුණු 32 ක්, පවන් රත්නායක ලකුණු 40 ක් හා චරිත් අසලංක ලකුණු 28 ක් ලබා ගැනීමට සමත් වූ අතර පන්දු යැවීමේදී එංගලන්ත කණ්ඩායම වෙනුවෙන් ජොෆ්‍රා ආචර් කඩුලු 2 ක් හා විල් ජැක්ස්, ලියාම් ඩෝසන්, අදිල් රෂීඩ් කඩුලු 1 බැගින් බිඳ හෙළීමට සමත් වුණා.
ඒ අනුව, ජයග්‍රාහී ඉලක්කය හඹා යාම සඳහා පිටියට පිවිසි එංගලන්ත කණ්ඩායම පන්දුවාර 7 යි පන්දු 2 ක් අවසානයේ කඩුලු 2 ක් දැවී ලකුණු 57 ක් ලබා සිටියදී තරගයට වර්ෂාවෙන් බාධා එල්ල වූ අතර යළි තරගය ආරම්භ කිරීමේදී ඩක්වර්ත් ලුවිස් න්‍යාය අනුව ඔවුන්ට ජයග්‍රහණය සඳහා හිමි වී තිබූ ඉලක්කය පන්දුවාර 17 ක් තුළ ලකුණු 168 ක් ලබා ගැනීමයි.
පන්දුවාර 16 යි පන්දු 4 ක් අවසානයේ කඩුලු 4 ක් දැවී ලකුණු 173 ක් ලබා ගනිමින් එංගලන්තය සිය ජයග්‍රාහී ඉලක්කය හඹා ගිය අතර, පන්දුවට පහර දීමේදී එංගලන්ත කණ්ඩායම වෙනුවෙන් ටොම් බැන්ටන් නොදැවී ලකුණු 54 ක් හා ජොස් බට්ලර් ලකුණු 39 ක් ලබා ගත් අතර පන්දු යැවීමේදී ශ්‍රී ලංකා කණ්ඩායම වෙනුවෙන් මතීෂ පතිරණ කඩුලු 2 ක් හා දසුන් ශානක හා දුනිත් වෙල්ලාලගේ එක් කඩුල්ල බැගින් බිඳ හෙළීමට සමත් වුණා.
තරග තුනකින් සමන්විත සංචාරක එංගලන්ත කණ්ඩායම හා ශ්‍රී ලංකාව අතර තරගාවලියේ එක් තරගයක් ඉතිරි ව තිබියදී තරගාවලියේ ජය තමන් සතු කර ගැනීමට එංගලන්ත කණ්ඩායම සමත් වුණා.
