සංචාරක නවසීලන්ත කණ්ඩායම හා ඉන්දියාව අතර ඊයේ පැවති පස්වන හා අවසන් විස්සයි විස්ස තරගය ලකුණු 46කින් ජයගැනීමට ඉන්දියාව සමත් වුණා.
විශාල ලකුණු පුවරු දෙකක් නිර්මාණය වූ මෙම විස්සයි විස්ස තරගයේ මුලින්ම පන්දුවට පහර දුන් ඉන්දීය කණ්ඩායම පන්දුවාර 20 අවසානයේ කඩුලු 5ක් දැවී ලකුණු 271ක් ලබාගැනීමට සමත් වුණා. ඒ ඉන්දියාව විස්සයි විස්ස තරගයකදී ලබාගත් තුන්වෙනි වැඩිම ලකුණු සංඛ්‍යාව ලෙස ද වාර්තා වුණා.
එසේම මෙම තරගයේදී ඉන්දීය කණ්ඩායම හයේ පහර 23ක් එල්ල කළ අතර එය ඔවුන් විස්සයි විස්ස තරගයකදී එල්ල කළ වැඩිම හයේ පහර සංඛ්‍යාවට සමාන වුනා.
ඊට පිලිතුරු වශයෙන් නවසීලන්ත කණ්ඩායම සියලු දෙනා දැවී ලකුණු 225ක් ලබාගත්තා.
ඉන්දියාව වෙනුවෙන් විශිෂ්ට ඉනිමක් ක්‍රීඩා කළ ඉෂාන් කිෂාන් සිය මංගල විස්සයි විස්ස ශතකය ලබාගනිමින් පන්දු 43ට ලකුණු 103ක් ලබාගත්තා. නායක සූර්ය කුමාර් යාදව් පන්දු 30ට ලකුණු 63ක් හා හර්දික් පාණ්ඩියා පන්දු 17ට ලකුණු 42ක් ලබාගත්තා.
ඉන්දීය ඉනිමේ කඩුලු ලබාගැනීමේදී ලොකී ෆර්ගසන් කඩුලු 2ක් හා ජේකබ් ඩෆී, කායිල් ජෙම්සන් හා මිචෙල් සැන්ට්නර් එක් කඩුල්ල බැගින් ලබාගත්තා.
නවසීලන්ත පිතිකරුවන් ද ප්‍රවේගකාරී ලෙස පන්දුවට පහරදුන්නත් තරගයේ ජයග්‍රහනය සඳහා එය ප්‍රමාණවත් වුණේ නැහැ. ලකුණු 225ට නවසීලන්ත සියලු කඩුලු දැවී ගියා.
ෆින් ඇලන් පන්දු 38ට ලකුණු 80ක් ලබාගත් අතර ඉෂ් සෝදි පන්දු 15ට ලකුණු 33ක් හා රචින් රවීන්ද්‍ර පන්දු 17ට ලකුණු 30ක් ලබාගත්තා.
පන්දු යැවීමේදී ඉන්දියාව වෙනුවෙන් අර්ෂ්දීප් සිං කඩුලු 5ක් දවාගත් අතර අක්සාර් පටෙල් කඩුලු 3ක් දවාගත්තා.
ඒ අනුව මෙම විස්සයි විස්ස තරගාවලිය තරග 4-1ක් ලෙස ඉන්දියාව ජයගත් අතර අවසන් තරගයේ වීරයා ලෙස ඉෂාන් කිෂාන් නම්කෙරුණා. තරගාවලියේ වීරයා සූර්ය කුමාර් යාදව්.
