ශ්‍රී ලංකා ඒ කණ්ඩායම හා නවසීලන්ත ඒ කණ්ඩායම අතර තරග දෙකකින් සමන්විත සිව්දින ටෙස්ට් තරගයේ දෙවන තරගයෙන් ඉනිමක හා ලකුණු 109ක ජයක් ලබාගැනීමට ශ්‍රී ලංකා ඒ කණ්ඩායම අද සමත් වුණා. තරගය පැවැත්වුණේ ගාල්ල ජාත්‍යයන්තර පිටියේදී යි.
පළමුවෙන් පන්දුවට පහර දුන් නවසීලන්ත ඒ කණ්ඩායම සිය පළමු ඉනිමට ලකුණු 305ක් ලබාගත්තා.
නවසීලන්ත කණ්ඩායම වෙනුවෙන් මැතිව් බොයිල් ලකුණු 102ක් ලබාගත් අතර කර්ටිස් හර්ෆී ලකුණු 59ක් ලබාගත්තා.
ශ්‍රී ලංකා ඒ කණ්ඩායම වෙනුවෙන් දිලුම් සුධීර ලකුණු 107ට කඩුලු 6ක් ලබාගත් අතර රමේෂ් මෙන්ඩිස් කඩුලු 3ක් හා දුලාජ් සමුදිත 1 කඩුල්ලක් දවාගත්තා.
ශ්‍රී ලංකා ඒ කණ්ඩායම පළමු ඉනිමට ලකුණු 518ක් ලබාගත්තා. කමිල් මිෂාර ලකුණු 174ක් ලබාගත් අතර ලහිරි උදාර ලකුණු 61ක්, සොනාල් දිනූෂ නොදැවී ලකුණු 60ක්, නිෂාන් මධුෂ්ක ලකුණු 57ක් හා නුවනිඳු ප්‍රනාන්දු ලකුණු 55ක් ලබාගත්තා.
නවසීලන්ත කණ්ඩායම වෙනුවෙන් ඩේල් ෆිලිප්ස් කඩුලු 3ක් දවාගත් අතර මයිකල් රේ, සයිමන් කීනි හා ටිම් ප්‍රින්ගල් කඩුලු 2 බැගින් දවාගත්තා.
ඒ අනුව නවසීලන්ත ඒ කණ්ඩායමට ශ්‍රී ලංකා කණ්ඩායමේ ලකුණු ප්‍රමාණය පසු කිරීම සඳහා ලකුණු 213 අවශ්‍යය වූ අතර ඔවුන්ට ලබාගැනීමට හැකිවුණේ ලකුණු 104ක් පමණයි. ඒ අනුව ශ්‍රී ලංකා කණ්ඩායමට ඉනිමක හා ලකුණු 109ක ජයක් හිමි වුණා.
ශ්‍රී ලංකා ඒ කණ්ඩායම පන්දු යැවීමේදී දිලුම් සුධීර කඩුලු 4ක් ලබාගත් අතර මොහොමඩ් ශිරාස් හා රමේෂ් මෙන්ඩිස් කඩුලු 2 බැගින් දවාගත්තා.
මේ ජයග්‍රහණයත් සමග ශ්‍රී ලංකා කණ්ඩායම තරගාවලිය තරග 1-0ක් ලෙස ජයගැනීමට සමත් වුණා.
