2025 යුරෝ ෆෝමියුලා විවෘත තරගාවලියේ පළමු අදියරේ ජය හිමි කර ගැනීමට ශ්‍රී ලංකා ක්‍රීඩක යෙවාන් ඩේවිඩ් සමත් වුණා.
මෙම වසරේ යුරෝ ෆෝමියුලා වන් විවෘත තරගාවලියට අදියර 8 ක් ඇතුළත්.
පෘතුගාලයේ පෝටිමාඕ ධාවන පථයේදී පැවති පළමු අදියරට තරග 3 ක් ඇතුළත්ව තිබුණා. එහි පළමු තරග‍යේදී ශ්‍රී ලංකා ක්‍රීඩක යෙවාන් ඩේවිඩ්, තරගය අවසන් කළේ, තුන්වැන්නා ලෙසයි. දෙවැනි තරගය වට 18 කින් සමන්විත වූ අතර, එය ජය ගැනීමට යෙවාන් ඩේවිඩ් සමත් වුණා.
ඒ සඳහා ඔහු ගත කළ කාලය මිනිත්තු 29 යි තප්පර 11 යි දශම 3 යි 4 ක්. තුන් වැනි තරගය, වට 14 කින් සමන්විත වූ අතර, එහි ජයග්‍රහණය ද හිමි වූයේ, යෙවාන් ඩේවිඩ්ටයි. ඒ සඳහා ඔහුට ගත වූ කාලය, මිනිත්තු 24 යි තප්පර 46 දශම 5 යි 8 ක්. තරග තුන අවසානයේ ප්‍රසාද ලකුණු 65 ක් සමග යෙවාන්, ශූරතාව හිමි කර ගැනීමට සමත් වුණා.
තවමත් 17 වැනි වියෙහි පසු වන යෙවාන් ඩේවිඩ්, යුරෝ ෆෝමියුලා වන් තරගාවලියක, අදියරක් ජය ගත් පළමු අවස්ථාව මෙයයි. 2025 යුරෝ ෆෝමියුලා වන් තරගාවලියේ දෙවැනි අදියර, ලබන මස 18 වැනිදා බෙල්ජියමේදී පැවැත්වීමට නියමිතයි.
