සිව් වැනි දකුණු ආසියානු කනිෂ්ඨ මලල ක්‍රීඩා තරගාවලියේ අනු ශූරතාව ශ්‍රී ලංකා කණ්ඩායමට..!!

සිව් වැනි දකුණු ආසියානු කනිෂ්ඨ මලල ක්‍රීඩා තරගාවලියේ අනු ශූරතාව හිමි කර ගැනීමට ශ්‍රී ලංකා කණ්ඩායම සමත්වුණා.

ඒ, රන්පදක්කම් 9 ක්, රිදි පදක්කම් 9 ක්, ලෝකඩ පදක්කම් 17 ක් සමග සමස්ත පදක්කම් 35 ක් හිමිකර ගනිමින්.

දින 3ක් පුරා තරගාවලිය පැවැත්වුණේ, ඉන්දියාවේ චෙන්නායිහිදී‍. අවසන් දිනය වූ ඊයේ රන් පදක්කම් 5 ක් හිමිකර ගැනීමට ශ්‍රී ලංකා කණ්ඩායම සමත්වුණා.

උස පැනීමේ පිරිමි ඉසව්වෙන් රන් පදක්කම හිමිකර ගත්තේ, ලෙසදු අර්තවිදු. ඒ, මීටර දෙකයි දශම 1 යි 9 ක උසක් වාර්තා කරමින්.

තරූෂ දිනුෂාන් එහි රිදි පදක්කම හිමිකර ගත්තා. තුන් පිම්ම පිරිමි ඉසව්වේ රන් පදක්කම හසිත දිසානායකට හිමි වුණා. ඔහු දැක්වූ දක්ෂතාව, මීටර 15 දශම බිංදුවයි 9 ක්.

එහි රිදි පදක්කම සෙනුර හංසකට හිමි වුණා. මීටර 200 පිරිමි ධාවන ඉසව්වේ රන් පදක්ම හිමි වුණේ, ඉඳුසර විදුෂාන්ට.

ඒ, තත්පර 21 දශම 3 යි 3 කින් තරගය අවසන් කරමින්. එහි ලෝකඩ පදක්කම මලිත් තමෙල් හිමි කර ගත්තා. මීටර 400 X 4 පිරිමි සහය ඉසව්වේ රන් පදක්කම ශ්‍රී ලංකාවට හිමි වුණා.

ඔවුන් තරගය නිම කිරීමට ගත කළ කාලය මිනිත්තු 3 යි තත්පර 9 යි දශම 3 යි 4 ක්. මීටර 100 X 4 පිරිමි සහය ධාවන ඉසව්වේ රන් පදක්කම ද ශ්‍රී ලංකාව හිමි කර ගත්තා. ඔවුන් තරගය නිම කළේ, තත්පර 40 යි දශම 2 යි 8 කින්.