ආසියානු කුසලාන විස්සයි විස්ස ක්‍රිකට් තරගාවලියේ ඇෆ්ගනිස්ථානය සමග පැවති තරගය ලකුණු අටකින් ජය ගැනීමට බංග්ලාදේශයේ ඊයේ සමත් වුණා.
එය පැවැත්වුණේ බී කාණ්ඩයේ තරගයක් ලෙසයි.
ඒ අනුව එම කාණ්ඩයෙන් මීළඟ වටේට සුදුසුකම් ලබාගන්නා කණ්ඩායම් දෙක තීරණය කෙරෙන තීරණාත්මක තරගය හෙට ශ්‍රී ලංකාව සහ ඇෆ්ඝනිස්ථානය අතර පැවැත්වීමට නියමිතයි.
බංග්ලාදේශය සහ ඇෆ්ඝනිස්ථානය අතර තරඟය පැවැත් වුණේ අබුඩාබි ක්‍රිකට් ක්‍රීඩාංගනයේදී.
තරගාවලියේ මීළඟ වටයට සුදුසුකම් ලබා ගැනීමේ බලාපොරොත්තු තබා ගැනීමට නම් බංග්ලාදේශයට මෙම තරගයේ ජයග්‍රහණය අනිවාර්ය වුණා.
පළමුවෙන් පන්දුවට පහර දුන් බංග්ලාදේශය පන්දුවාර 20 ඇතුලත කඩුලු 5 ක් දැවී ලකුණු 154 ක් රැස් කලා.
පිළිතුරු ලෙස ඇෆ්ගනිස්ථානයට පන්දු වාර විස්ස ඇතුළත සියලු ක්‍රීඩකයින් දැවී රැස්කිරීමට හැකිවුණේ ලකුණු
146 ක් පමණයි.
ඒ අනුව බංගලාදේශයේ තරඟය ජයගත් අතර ඔවුන් බී කාණ්ඩයේ දෙවැනි ස්ථානය දක්වා ඉදිරියට පැමිණියා.
තවමත් එම කාණ්ඩයේ පෙරමුණේ පසු වන්නේ ශ්‍රී ලංකා කණ්ඩායමයි.
හෙට ඇෆ්ගනිස්ථානය සමග පැවැත්වෙන තරගය ජයගැනීමට ශ්‍රී ලංකාවට හැකි වුවහොත් ශ්‍රී ලංකාව සහ බංගලාදේශය එම කාණ්ඩයෙන් මීළඟ වටයට සුදුසුකම් ලබනවා.
යම් හෙයකින් ශ්‍රී ලංකාවට තරඟය පරාජය වීමට සිදුවුවහොත්, පළමුවෙන් පන්දුවට පහරදී ප්‍රතිවාදී ඇෆ්ගනිස්ථානයට එම ලකුණු සංඛ්‍යාව පන්දුවාර දොළහකට අඩු සංඛ්‍යාවකින් හඹා යෑම වැළැක්විය යුතුයි.
දෙවනියට පන්දුවට පහර දුනහොත් ඔවුන්ට පරාජය වීමේ ලකුණු පරතරය ලකුණු හැත්තෑවට වඩා අඩුවෙන් තබා ගත යුතුයි.
එසේ වුවහොත් ශ්‍රී ලංකාවට මීළඟ වටයට සුදුසුකම් ලබා ගැනීමේ අවස්ථාව හිමිවනු ඇති.
