ආසියානු කුසලාන කාන්තා 20-20 ක්‍රිකට් තරගාවලියේ අවසන් මහා තරගයට සුදුසුකම් ලබාගැනීමට ඉන්දීය කණ්ඩායම සමත්වුණා.
ඒ බංග්ලාදේශ කණ්ඩායම සමග ඊයේ පැවති පළමු අවසන් පූර්ව තරගය ලකුණු 40 කින් ජය ගනිමින්.
ඉන්දියාව, ආසියානු කුසලාන කාන්තා 20-20 තරගාවලියක අවසන් මහා තරගයක අඛණ්ඩව සුදුසුකම් ලැබු 6 වැනි අවස්ථාව මෙයයි. තරගය පැවැත්වුණේ ඩුබායි හිදී.
කාසියේ වාසිය හිමිකරගත් බංග්ලාදේශ කණ්ඩායම පළමුවෙන් පන්දුවට පහරදීමේ අවස්ථාව ඉන්දියාවට ලබාදුන්නා.
ඒ අනුව ඔවුන් පන්දුවාර 20 තුළ කඩුලු 6 ක් දැවී ලකුණු 149 ක් රැස් කළා. ෂෆාලි වර්මා ලකුණු 64 යි.
නයිකා හර්මන්ප්‍රීට් කෞර් ලකුණු 24 ක් ලබාගත්තා. පන්දු යැවීමේදි බංග්ලාදේශ කණ්ඩායමේ සුල්තානා ඛාතුන් කඩුලු 2 ක් දවාගත්තා.
ලකුණු 150 ක ජයග්‍රාහී ඉලක්කයක් හඹා ගිය බංග්ලාදේශ කණ්ඩායමට පන්දුවාර 20 තුළ කඩුලු 7 ක් දැවී රැස්කර ගැනීමට හැකිවූයේ ලකුණු 109 ක් පමණයි.
ඩිලාරා අක්ටර් ලකුනු 21 යි.ෂොර්නා අක්ටර් නොදැවී ලකුණු 22 ක් ලබාගත්තා.
පන්දු යැවීමේදි ඉන්දියා කණ්ඩායමේ දීප්ති ශර්මා කඩුලු 3 ක් බිඳහෙලුවා. නන්දනී ශර්මා කඩුලු 2 ක් දවාගත්තා.
ඒ අනුව ඉන්දියා කණ්ඩායම ලබන 13 වැනිදා පැවැත්වෙන ආසියානු කුසලාන කාන්තා 20-20 ක්‍රිකට් තරගාවලියේ අවසන් මහා තරගයට සුදුසුකම් ලැබුවා.
මින් පෙර ඉන්දියා කාන්තා කණ්ඩායම අවස්ථා 3 කදි ශූරතාව හිමිකරගෙන ඇති අතර, අවස්ථා දෙකකදි අනුශූරතාව හිමිකරගෙන තිබෙනවා.
2024 වසරේ පැවති ආසියානු කුසලාන කාන්තා 20-20 ක්‍රිකට් තරගාවලියේදි ශ්‍රී ලංකාව ශූරතාව දිනාගත් අතර, ඉන්දියාවට හිමිවූයේ අනුශූරතාවයි.
2026 ආසියානු කුසලාන කාන්තා 20-20 ක්‍රිකට් තරගාවලියේ දෙවැනි අවසන් පූර්ව තරගය ශ්‍රී ලංකාව සහ පකිස්තාන කණ්ඩායම් අතර, අද රාත්‍රී 8 ට ඩුබායි හිදි පැවැත්වෙනවා.
