සංචාරක බටහිර කොදෙව් කණ්ඩායම හා නවසීලන්තය අතර තුන්වන ටෙස්ට් තරගයේ දෙවන දිනයේදී, නවසීලන්ත ආරම්භක පිතිකරු ඩෙවෝන් කොන්වේ ද්විත්ව ශතකයක් වාර්තා කරමින් නවසීලන්තය ප්‍රභල ස්ථානයකට රැගෙන ගියා.
පළමුවෙන් පන්දුවට පහර දෙන නවසීලන්ත කණ්ඩායම සිය පළමු ඉනිමේ දෙවන දිනය ආරම්භ කළේ කඩුලු 1ට ලකුණු 334ක් ලබාසිටියදී යි.
දෙවන දිනයේ තුන්වන තරග සැසියේදී නවසීලන්ත කණ්ඩායම කඩුලු 8ට ලකුණු 575ක් ලබාසිටියදී ඉනිම අත්හැර කොදෙව් කණ්ඩායමට පිතිකරණය සඳහා ආරධනා කළා.
දර්ශනීය ටෙස්ට් ඉනිමක් ක්‍රීඩා කළ ඩෙවෝන් කොන්වේ ලකුණු 227ක් හා ටොම් ලේතම් ලකුණු 137ක් ලබාගත්තා. මීට අමතරව කේන් විලියම්සන් ලකුණු 31ක්, රචින් රවීන්ද්‍ර නොදැවී ලකුණු 72ක් හා අජාස් පටෙල් නොදැවී ලකුණු 30ක් ලබාගත්තා.
බටහිර ඉන්දීය කොදෙව් කණ්ඩායම වෙනුවෙන් ජේඩ්න් සීල්ස්, ඇන්ඩර්සන් ෆිලිප්ස් හා ජස්ටින් ග්‍රීව්ස් කඩුලු 2 බැගින් දවාගත් අතර කෙමාර් රෝච් හා රොස්ටන් චේස් එක් කඩුල්ල බැගින් දවාගත්තා.
තරගය දෙවන දිනට නිමා කරන විට කොදෙව් කණ්ඩායම සිය පළමු ඉනිමට කිසිවෙකු නොදැවී ලකුණු 110ක් ලබාසිටියා. ජෝන් කැම්බල් නොදැවී ලකුණු 45ක් හා බ්‍රැන්ඩන් කින්ග් නොදැවී ලකුණු 55යි.
