‘ඒ’ කණ්ඩායම් අතර තුන්කොන් එක්දින ක්‍රිකට් තරගාවලියේ ශූරතාව හිමි කර ගැනීමට ඉන්දියාව සමත් වුණා.
ඒ, ශ්‍රී ලංකාව සමග අද පැවති අවසන් තරගය ලකුණු 66 කින් ජය ගනිමින්.
තරගය පැවැත්වුණේ, දඹුල්ල අන්තර් ජාතික ක්‍රිකට් ක්‍රීඩාංගණයේදී. කාසියේ වාසිය හිමි කර ගත් ශ්‍රී ලංකා කණ්ඩායම, පළමුවෙන් පන්දුවට පහරදීමේ අවස්ථාව ඉන්දියාව කණ්ඩායමට ලබා දුන්නා.
ඒ අනුව, ඉන්දීය කණ්ඩායමේ ආරම්භක පිතිකරුවන් ලෙස පිටියට පිවිසියේ ප්‍රියන්ෂ් ආර්ය සමගින් විභව් සූර්යවංශි.
ඔවුන් දෙදෙනා පළමු කඩුල්ලට ලකුණු 132 ක ශක්තිමත් සබඳතාවක් ගොඩනැගුවා. විභව් සූර්යවංශි 6 පහර 5 ක් සහ 4 පහර 5 ක් සමගින් පන්දු 11 කදී වේගවත් අර්ධශතකයක් වාර්තා කිරීමට සමත් වුණා.
එය වාර්තා අතරට එක් වුණේ, ‘ලිස්ට් ඒ’ තරගයකදී ක්‍රීඩකයෙකු ලබා ගත් වේගවත්ම අර්ධ ශතකය ලෙසයි. මින් පෙර මෙම වාර්තාව තබා තිබුණේ, ශ්‍රී ලංකා ක්‍රීඩක කෞෂල්‍ය වීරරත්නයි.
ඒ, 2005 වසරේදී කැනඩා ‘ඒ’ කණ්ඩායමට එරෙහිව පන්දු 12 කදී අර්ධ ශතකය ලබා ගනිමින්.
විභව් සූර්යවංශි පන්දු 29 කදී ලකුණු 94 ක් රැස් කළා. නායක තිලක් වර්මා ලකුණු 67 යි. ඒ අනුව, ඉන්දියා කණ්ඩායම නියමිත පන්දුවාර 50 තුළ කඩුලු 9 ක් දැවී ලකුණු 377 ක් ලබා ගත්තා.
පන්දු යැවීමේදී කුගතාස් මතුලන්, රවිදු ප්‍රනාන්දු සහ වනුජ සහන් කඩුලු 2 බැගින් බිඳහෙලුවා.
පිළිතුරු ඉනිම ක්‍රීඩා කළ ශ්‍රී ලංකා කණ්ඩායමට පන්දුවාර 47 යි පන්දුවක් අවසානයේ සියලුදෙනා දැවී රැස් කර ගැනීමට හැකි වූයේ, ලකුණු 311 ක් පමණයි.
සධීර සමරවික්‍රම ලකුණු 52 ක් ලබා ගත්තා. වනුජ සහන් ලකුණු 62 යි. පන්දු යැවීමේදී යාෂ් තාකුර් සහ විප්රාජ් නිගම් කඩුලු 3 බැගින් බිඳහෙලුවා.
