දකුණු අප්‍රිකාව හා එංගලන්තය අතර තරග 3කින් සමන්විත 20-20 තරගාවලියේ 2වන තරගයේදී එංගලන්ත කණ්ඩායම වාර්තාගත ලෙස ලකුණු 304ක් ලබාගැනීමට සමත් වුණා.
කාසියේ වාසිය දිනූ දකුණු අප්‍රිකානු කණ්ඩායම මුලින්ම පන්දුවට පහරදීමට එංගලන්තයට ආරාධනා කළා. ඒ අනුව එංගලන්ත කණ්ඩායම සිය පන්දුවාර 20 අවසානයේදී කඩුලු 2ක් පමණක් දැවී ලකුණු 304ක් ලබාගත්තා.
මෙම ලකුණු සංඛ්‍යාව එංගලන්ත කණ්ඩායම ලබාගත් ඉහළම ලකුණු සංඛ්‍යාව මෙන්ම 20-20 ඉතිහාසයේ දැනට කණ්ඩායමක් ලබාගෙන ඇති තුන්වන ඉහළම ලකුණු සංඛ්‍යාවයි.
එංගලන්ත කණ්ඩායම වෙනුවෙන් ෆිල් සොල්ට් පන්දු 39ට නොදැවී ලකුණු 141ක් ලබාගත්තා.
එම ලකුණු සංඛ්‍යාව එංගලන්තය වෙනුවෙන් පිතිකරුවෙක් 20-20 තරගයකදී ලබාගත් ඉහළම ලකුණු සංඛ්‍යාවයි. එසේම මෙම ශතකය එංගලන්ත ක්‍රීඩකයෙකු ලබාගත් වේගවත්ම ශතකයද වනවා.
මීට අමතරව ජොස් බට්ලර් ලකුණු 83ක් ලබාගත්තා.
එසේම එංගලත් ඉනිමට හතරේ පහර 30ක් හා හයේ පහර 18ක් ඇතුලත් වීමද විශේෂත්වයක්.
මේ දැවැන්ත ලකුණු අභියෝගය හඹායෑමට පිටියට පිවිසි දකුණු අප්‍රිකානු කණ්ඩායමට ලබාගත හැකිවූයේ සියලු දෙනා දැවී ලකුණු 158ක් පමණයි.
ඒ අනුව දෙරට අතර දෙවන 20-20 තරගය ලකුණු 146කින් ජයගැනීමට එංගලන්ත කණ්ඩායම සමත් වුණේ තරගාවලිය 1-1ක් ලෙස සම තත්වයට පත්වෙමින්.
