මෙවර එල්පීඑල් තරගාවලියේ අවසන් මහා තරගයට සුදුසුකම් ලැබිමට ගෝල් ගැලන්ට්ස් කණ්ඩායම සමත් වුණා. ඒ කලම්බු කැප්ස් කණ්ඩායම සමග ඊයේ පැවති අවසන් පූර්ව තරගය කඩුලු 6කින් ජය ගනිමින්.
පළමුවෙන් පන්දුවට පහරදුන් කලම්බු කැප්ස් කණ්ඩායම සියලු දෙනා දැවී ලකුණු 176ක් ලබාගත්තා.
කලම්බු කැප්ස් වෙනුවෙන් රවිඳු ප්‍රනාන්දු ලකිඋණු 48ක් හා රූබන් හර්මන් ලකුණු 45ක් ලබාගත්තා. පන්දු යැවීමේදී ගැලන්ට්ස් වෙනුවෙන් චරිත් අසලංක හා සචිදු කොළඹගේ කඩුලු 2 බැගින් දවාගත්තා.
ලකුණු 177ක ඉලක්කයක් හඹා ගිය ගෝල් ගැලන්ට්ස් කණ්ඩායම පන්දුවාර 18යි පන්දු 4දී කඩුලු 4ක් පමණක් දැවී තරගය ජයගැනීමට සමත් වුණා.
එහිදී සෑම් හාපර් ලකුණු 77ක් හා චරිත් අසලංක ලකුණු 59ක් ලබාගත්තා. කලම්බු කැප්ස් වෙනුවෙන් රවිඳු ප්‍රනාන්දු කඩුලු 2ක් දවාගත්තා.
ඒ අනුව ගෝල් ගැලන්ට්ස් කණ්ඩායම අවසන් මහා තරගයට සුදුසුකම් ලැබූ අතර අවසන් මහා තරගය ජැෆ්නා කිංග්ස් කණ්ඩායමට එරෙහිව අද පස්වරු 7.30ට කොළඹ ආර් ප්‍රේමදාස ක්‍රීඩාංගණයේදී පැවැත්වීමට නියමිතයි.
