ඊයේ පැවති පංජාබ් කිංග්ස් කණ්ඩායමට එරෙහි තරගය ලකුණු 33කින් ජයගත් සන්රයිසස් හයිද්‍රබාද් කණ්ඩායම ප්‍රසාද ලකුණු සටහනේ පලමු ස්ථානයට පැමිණීමට සමත් වුණා.
මුලින් පන්දුවට පහර දුන් හයිද්‍රබාද් කණ්ඩායම කඩුලු 4ට ලකුණු 235ක් ලබාගැනීමට සමත් වුණා. එහිදී හෙන්රික් ක්ලාසන් පන්දු 43ට ලකුණු 69ක් හා ඉෂාන් කිෂාන් පන්දු 32ට ලකුණු 55ක් ලබාගත්තා. ඊට අමතරව අභිෂේක් ශර්මා ලකුණු 35ක්, ට්‍රැවිස් හෙඩ් ලකුණු 38ක් හා නිතිෂ් කුමාර් රෙඩ්ඩි නොදැවී ලකුණු 29ක් ලබාගත්තා.
පන්දු යැවීමේදී පංජාබ් කණ්ඩායම වෙනුවෙන් ආර්ෂ්දීප් සිං, ලොකී ෆර්ගසන්, යුස්වේන්ද්‍ර චහාල් හා විජේකුමාර් වෛෂැක් කඩුලු 1 බැගින් දවාගත්තා.
පිළිතුරු ඉනිම වෙනුවෙන් පංජාබ් කණ්ඩායමට පන්දුවාර 20 අවසානයේදී ලබාගැණීමට හැකිවුණේ කඩුලු 7ක් දැවී ලකුණු 202ක් පමණයි. හුදෙකලා සටනක නිරතවෙමින් කූපර් කොනලි නොදැවී පන්දු 59ට ලකුණු 107ක් ලබාගත් අතර එය ඔහුගේ පළමු අයිපීඑල් ශතකය යි.
ඔහුට අමතරව මාකස් ස්ටොයිනිස් ලකුණු 28ක් හා සූර්‍යන්ෂ් ෂෙඩ්ගේ ලකුණු 25ක් ලබාගත්තද එම දායකත්වය තරගයේ ජයග්‍රහණය සඳහා ප්‍රමාණවත් වූයේ නැහැ.
හයිද්‍රබාද් කණ්ඩායමේ නායක පැට් කමින්ස් හා ෂිවාන් කුමාර් කඩුලු 2 බැගින් දවාගත් අතර එෂාන් මාලිංග, නිතිෂ් කුමාර් රෙඩ්ඩි හා සකීබ් හුසේන් එක කඩුල්ල බැගින් දවාගත්තා.
මේ ජයග්‍රහණයත් සමග සන්රයිසස් හයිද්‍රබාද් කණ්ඩායම ප්‍රසාද ලකුණු සටහනේ අංක එකට පැමිණි අතර පංජාබ් කිංග්ස් කණ්ඩායම අංක 2 ස්ථානයේ පසුවෙනවා.
තරගාවලියේ 50 වන තරගය ලක්නව් සුපර් ජයන්ට්ස් හා රෝයල් චැලේන්ජර්ස් බැංගලෝර් කණ්ඩායම් අතර අද ලක්නව් හීදී පැවැත්වීමට නියමිතයි.
