අයි පී එල් 2025 තරගාවලියේ ඊයේ පැවති තරගයෙන් ලකුණු 50ක ජයක් ලැබීමට රෝයල් චැලේන්ජර්ස් බැංගලෝර් කණ්ඩායම ඊයේ සමත් වුණා. ඒ චෙන්නයි සුපර් කිංග්ස් කණ්ඩායමට එරෙහිවයි.
කාසියේ වාසිය දිනා මුලින්ම පන්දු යැවීමට සුපර් කිංග්ස් කණ්ඩායම තීරණය කළා.
මුලින් පන්දුවට පහරදෙමින් රෝයල් චැලේන්ජර්ස් කණ්ඩායම කඩුලු 7ට ලකුණු 196ක් ලබාගත්තා.
නායක රජත් පතිදාර් ලකුණු 51යි. ෆිල් සෝල්ට් ලකුණු 32යි. විරාත් කෝලි ලකුණු 31යි.
චෙන්නයි කණ්ඩායම වෙනුවෙන් නූර් අහමඩ් කඩුලු 3ක් හා මතීෂ පතිරණ කඩුලු 2ක් ලබාගත්තා.
පිලිතුරු ඉනිම සඳහා පිටියට පිවිසි චෙන්නයි සුපර් කිංග්ස් කණ්ඩායමට ලබාගැනීමට හැකිවුණේ කඩුලු 8ක් දැවී ලකුණු 146ක් පමණයි. රචින් රවීන්ද්‍ර ලකුණු 41ක් හා මහේන්ද්‍ර සිං දෝනි ලකුණු 30ක් ලබාගත්තා.
පන්දු යැවීමේදී ජොෂ් හේසල්වුඩ් කඩුලු 3ක්, ලියම් ලිවින්ග්ස්ටන් කඩුලු 2ක් හා යෂ් දයාල් කඩුලු 2ක් ලබාගත්තා.
මෙම ජයග්‍රහණය රෝයල් චැලේන්ජර්ස් කණ්ඩායම පිට පිට ලැබූ දෙවන ජයයි.
