සංචාරක ඉන්දීය කණ්ඩායම හා ඕස්ට්‍රේලියාව අතර තරග 5කින් සමන්විත 20-20 තරගාවලියේ සිව්වන තරගය අද ඕස්ට්‍රේලියාවේ කරාරා හීදී පැවැත්වුණා. එම තරගයෙන් ලකුණු 48ක ජයක් ලැබීමට ඉන්දියාව සමත් වුණේ තරගාවලියේ තරග 2-1ක් ලෙස පෙරමුණට එමින්.
කාසියේ වාසිය දිනූ ඕස්ට්‍රේලීයානු නායක මිචෙල් මාෂ් මුලින්ම පන්දු රැකීමට තීරණය කළා. ඒ අනුව, ඉන්දීය කණ්ඩායම සිය ඉනිමට කඩුලු 8ක් දැවී ලකුණු 167ක් ලබාගත්තා.
ඉන්දීය ආරම්භක පිතිකරුවන් වන ශුබ්මන් ගිල් ලකුණු 46ක් හා අභිෂේක් ශර්මා ලකුණු 28ක් ලබාගත් අතර ඉනිමේ අවසාන භාගයේදී අක්සාර් පටෙල් නොදැවී වේගවත් ලකුණු 21ක් ලබාගත්තා.
ඕස්ට්‍රේලියාව වෙනුවෙන් ඇඩම් සැම්පා හා නේදන් එලිස් කඩුලු 3 බැගින් ලබාගත්තා.
පිලිතුරු ඉනිම ක්‍රීඩා කළ ඕස්ට්‍රේලියානු කණ්ඩායමේ සියලු කඩුලු ලකුණු 119කට දවාගැනීමට ඉන්දීය පන්දු යවන්නන් සමත් වුනා.
ඕස්ට්‍රේලියානු ආරම්භක පිතිකරුවන් වන මිච් මාෂ් ලකුණු 30ක් හා මැතිව් ෂෝර්ට් ලකුණු 25ක් ලබාගත් අතර අනෙකුත් පිතිකරුවන්ට සාර්ථක වීමට හැකියාවක් ලැබුණේ නැහැ.
පරභල ඕස්ට්‍රේලියානු පිතිකරුවන් මෙල්ල කරමින් වොෂ්ංටන් සුන්දර් කඩුලු 3ක් දවාගත් අතර අක්සාර් පටෙල් හා ශිවාම් ඩුබේ කඩුලු 2 බැගින් දවාගත්තා.
ඒ අනුව මේ තරගය ලකුණු 48කින් ජයගැනීමට ඉන්දීය කණ්ඩායම සමත් වුණු අතර තවත් තරගයක් ඉතිරිව තිබියදී තරග 2-1ක් ලෙස පෙරමුණ ගැනීමට ඉන්දීය කණ්ඩායම සමත් වුණා.
තරගයේ වීරයා ලෙස පන්දුවෙන් මෙන්ම පිත්තෙන් ද දස්කම් දැක්වූඅක්සාර් පටෙල් නම් කෙරුණා.
