සංචාරක ශ්‍රී ලංකා කණ්ඩායම හා බටහිර ඉන්දීය කොදෙව් කණ්ඩායම අතර තරග දෙකකින් සමන්විත ටෙස්ට් තරගාවලියේ අවසන් තරගය ඊයේ දින අවසන් වුණේ ජය පරාජයෙන් තොරව වූ අතර තරගාවලියේ ජය තරග 1-0ක් ලෙස ලබාගත්තේ කොදෙව් කණ්ඩායමයි.
පලමුවෙන් පන්දුවට පහරදුන් ශ්‍රී ලංකා කණ්ඩායම සිය පළමු ඉනිමට කඩුලු 9ක් දැවී ලකුණු 549ක් ලබාගෙන ඉනිම අත්හිටවූවා.
ශ්‍රී ලංකාව වෙනුවෙන් සිය පළමු ටෙස්ට් ශතකය ලබාගත් ලහිරු උදාර ද්විත්ව ශතකය පෙනෙන මානයේදී දැවී ගියේ ලකුණු 188ක් ලබාසිටියදීයි. එසේම තවත් නවක පිතිකරුවකු වන සොනාල් දිනූශ ලකුණු 92ට දැවී ගියා. කමිඳු මෙන්ඩිස් ලකුණු 84ක් හා කුසල් මෙන්ඩිස් ලකුණු 69ක් ලබාගෙන ශ්‍රී ලංකා පළමු ඉනිම ශක්තිමත් කළා.
කොදෙව් කණ්ඩායම වෙනුවෙන් ජේඩ්න් සීල්ස් හා ශමාර් ජෝසෆ් කඩුලු 2 බැගින් ලබාගත්තා. අල්සාරී ජෝසෆ්, ඇන්ඩර්සන් ෆිලිප්, ජස්ටිං ග්‍රීව්ස්, රොස්ටන් චේස් හා කැවම් හොජ් එක් කඩුල්ල බැගින් දවාගත්තා.
සිය පළමු ඉනිම සඳහා කොදෙව් කණ්ඩායම ලකුණු 499ක් ලබාගත්තා. එහිදී ජස්ටින් ග්‍රීව්ස් ලකුණු 180ක් ලබාගත් අතර ෂේ හෝප් ලකුණු 112ක් ලබාගත්තා. ජෝන් කැම්බල් ලකුණු 72යි.
පන්දු යැවීමේදී ශ්‍රී ලංකා කණ්ඩායම වෙනුවෙන් අසිත ප්‍රනාන්දු කඩුලු 5ක් දවාගැනීමට සමත් වුණා. ප්‍රභාත් ජයසූරිය කඩූලු 3ක් දවාගත් අතර මිලාන් රත්නායක හා සොනාල් දිනූශ 1 කඩුල්ල බැගින් දවාගත්තා.
ලකුණු 50ක ඉදිරියක් සමගින් දෙවන ඉනිම ආරම්භ කළ ශ්‍රී ලංකා පිතිකරුවන් කඩුලු 9ට ලකුණු 251ක් ලබා පන්දුවට පහරදීමට කොදෙව් කණ්ඩායමට අවස්ථාව ලබාදුන්නා.
ශ්‍රී ලංකා දෙවන ඉනිම වෙනුවෙන් දිනේශ් චන්දිමාල් ලකුණු 71ක් ලබාගත් අතර කමිඳු මෙන්ඩිස් ලකුණු 44ක් හා ධනන්ජය සිල්වා ලකුණු 34ක් ලබාගත්තා.
ඒ අනුව කොදෙව් කණ්ඩායමට තරගය ජයගැනීම සඳහා ලකුණු 302ක් අවශ්‍යය වුණා. කොදෙව් කණ්ඩායම දෙවන ඉනිම ආරම්භ කළේ අවසන් දිනයේ දිවා ආහරයෙනුත් පසුවයි. දිනය අවසානයේදී ඔවුන් කිසිදු කඩුල්ලක් නොදැවී ලකුණු 109ක් ලබාසිටියා. කොදෙව් ආරම්භක පිතිකරුවන් යුගලය වන ජෝන් කැම්බල් හා බ්‍රෙන්ඩන් කින්ග් නොදැවී ලකුණු 51ක බැගින් ලබාගත්තා.
ඒ අනුව අවසන් ටෙස්ට් තරගය ජය පරාජයෙන් තොරව අවසන් වූ අතර තරගාවලියේ වීරයා ලෙස පිත්තෙන් මෙන්ම පන්දුවෙන්ද දස්කම් දැක්වූ ජස්ටිං ග්‍රීව්ස් හට හිමිවුණා.
ලොක ටෙස්ට් ශූරතාවයේ තරගාවලියක් වූ මේ තරගාවලිය 1-0ක් ලෙස ජයගැනීමට සමත් වුණේ බටහිර ඉන්දීය කොදෙව් කණ්ඩායමයි.
මේ තරගාවලි පරාජයත් සමග ශ්‍රී ලංකා කණ්ඩායම ප්‍රසාද ලකුණු සටහනේ ස්ථාන 3කින් පසුබැස්සා. තරගාවලිය ආරම්භයේදී ශ්‍රී ලංකා කණ්ඩායම තුන්වන ස්ථානයේ රැඳී සිටි අතර මේ පරාජයත් සමග හයවන ස්ථානය දක්වා පසුබැස තිබෙනවා.
මෙවර ටෙස්ට් ශූරතාවයේ ශ්‍රී ලංකා කණ්ඩායම මේ වන විට තරග 4ක් ක්‍රීඩා කොට ඇති අතර ඉන් එක් තරගයක් ජයගෙන, එක් තරගයක් පරාජය වී, තරග දෙකක් ජයපරාජයෙන් තොරව අවසන් කරගෙන ඇත. ටෙස්ට් ශූරතාවයේ ශ්‍රී ලංකා කන්ඩායම තරග වදින මේ ලඟ ටෙස්ට් තරගාවලිය ඉන්දියවට එරෙහිව යි.
