ඉන්දීය 19න් පහළ කණ්ඩායමත් ඇෆ්ගනිස්තාන 19න් පහළ කණ්ඩායමත් අතර ඊයේ පැවති ලෝක කුසලාන අවසන් පූර්ව තරගයෙන් කඩුලු 7ක ජයක් ලැබීමට ඉන්දීය කණ්ඩායම සමත් වුණා.
පළමුවෙන් පන්දුවට පහරදුන් ඇෆ්ගනිස්තාන කණ්ඩායම කඩුලු 4ට ලකුණු 310ක් ලබාගැනීමට සමත් වුණා. කෙසේ වෙතත් ඉන්දීය ප්‍රභල පිතිකරණ ලැයිස්තුව ඉදිරියේ මේ ලකුණු ප්‍රමාණය ප්‍රමාණවත් වූයේ නැහැ.
ඇෆ්ගනිස්තානය වෙනුවෙන් ශතක දෙකක් වාර්තා වුණා. ඒ අනුව ෆයිසාල් ශිනෝසාදා පන්දු 93ට ලකුණු 110ක් හා උසයිරුල්ලා නියාසායි පන්දු 86ට ලකුණු 101ක් ලබාගත්තා.
ඉන්දීය කණ්ඩායම වෙනුවෙන් දීපේෂ් දේවේන්ද්‍රන් කඩුලු 2ක් හා කනිශ්ක් චවුහාන් කඩුලු 2ක් ලෙස කඩුලු ලබාගත්තා.
පිලිතුරු ඉනිම ක්‍රීඩා අක්ළ ඉන්දීය යොවුන් ක්‍රීඩකයන් පන්දුවාර 41.1දී කඩුලු 3ක් පමණක් දැවී ලකුණු 311ක් ලබාගෙන තරගයේ ජය ලබාගැනීමට සමත් වුණා.
ආරම්භක පිතිකරුවන් වන ආරෝන් ජෝර්ජ් පන්දු 104ට ලකුණු 115ක් හා වෛභව් සූර්යවංශි පන්දු 33ට ලකුණු 68ක් ලබාගත්තා. ඉන්පසු පිටියට පිවිසි නායක ආයුෂ් මාත්‍රේ ලකුණු 62ක් හා විහාන් මල්හෝත්‍රා නොදැවී 38ක් ලබාගත්තා.
ඒ අනුව මේ අවසන් පූර්ව තරගය ජයගත් ඉන්දීය කණ්ඩායම මෙවර 19න් පහළ ලෝක කුසලානයේ අවසන් මහා තරගයට සුදුසුකම් ලැබූ අතර, එංගලන්ත 19න් පහළ කණ්ඩායමත් සමග අවසන් මහා තරගයට හෙට දින සහභාගීවීමට නියමිතයි.
