2026 ඉන්දියන් ප්රිමියර් ලීග් තරගාවලියේ පළමු තරගය රෝයල් චැලේන්ජර්ස් බැංගලෝර් කණ්ඩායම හා සන් රයිසස් හයිද්රබාද් කණ්ඩායම අතර ඊයේ චින්නස්වාමි ක්රීඩාංගණයේදී පැවැත්වුණා. එම තරගය කඩුලු 6කින් ජයගැනීමට බැංගලෝර් කණ්ඩායම සමත් වුණා.
කාසියේ වාසිය දිනූ බැංගලෝර් නායක රජත් පටිදාර් මුලින්ම පන්දු රැකීමට තීරණය කළා.
ඒ අනුව පන්දුවට පහර දීමට පිටියට පිවිසි හයිද්රබාද් කණ්ඩායමේ පළමු කඩුලු 3ම ලකුණු 29ට පවර් ප්ලේ එක තුළදීම දැවී ගියා.
ඉන් අනතුරුව නායක ඉෂාන් කිෂන් සමග හෙන්රික් ක්ලාසන් 4වන කඩුල්ල සඳහා ලකුණු 97ක සබඳතාවයක් ගොඩනැගුවා.
මෙම සබඳතාවයෙන් පසුව හයිද්රබාද් කණ්ඩායමෙ කඩුලු විටින් විට බිඳී ගියත් අනිකෙත් වර්මාගේ ප්රවේගකාරී ඉනිම මුලු ලකුණු සංඛ්යාව කඩුලු 9ට ලකුණු 201 දක්වා රැගෙන ගියා.
ඉෂාන් කිෂන් පන්දු 38ට ලකුණු 80යි. අනිකෙත් වර්මා පන්දු 18ට ලකුණු 43ක් හා හෙන්රික් ක්ලාසන් ලකුණු 31ක් ලබාගත්තා.
පන්දු යැවීමේදී ජේකබ් ඩෆී හා රොමාරියෝ ශෙෆර්ඩ් කඩුලු 3 බැගින් දවාගත්තා. ඊට අමතරව බුවනේෂ්වර් කුමාර්, අභිනන්දන් සිං, සුයාෂ් ශර්මා එක් කඩුල්ල බැගින් දවාගත්තා.
පිලිතුරු ඉනිම ක්රීඩා කළ රෝයල් චැලේන්ජර්ස් බැංගලෝර් කණ්ඩායම කඩුලු 4ක් පමණක් දැවී, පන්දු 26ක් ඉතිරිව තිබියදී තරගයේ ජයග්රහණය ලැබීමට සමත් වුණා.
තවත් සුපිරි ඉනිමක් ක්රීඩා කරමින් විරාත් කෝලි නොදැවී පන්දු 38ට ලකුණු 69ක් ලබාගත්තා. දෙව්දත් පඩිකල් පන්දු 26ට ලකුණු 61යි. රජත් පටිදාර් පන්දු 12ට ලකුණු 31ක් ලබාගත්තා.
පන්දු යැවීමේදී හයිද්රබාද් කණ්ඩායම වෙනුවෙන් ඩේවිඩ් පේන් කඩුලු 2ක් දවාගත් අතර ජයදේව් උනද්කට් හා හර්ෂ් ඩුබේ එක් කඩුල්ල බැගින් දවාගත්තා.
මෙම තරගය සඳහා ශ්රී ලංකා කණ්ඩායමේ එෂාන් මාලිංග හයිද්රාබාද් කණ්ඩායමට ක්රීඩා කළ අතර ඔහුට ඊයේ දින සාර්ථක වීමට නොහැකි වූ අතර ඔහු යැවූ පන්දුවාර 2ට ලකුණු 35ක් ලබාගැනීමට බැංගලෝර් පිතිකරුවන් සමත් වූණා.
ගියවර ශූරතාවය දිනූ රෝයල් චැලේන්ජර්ස් බැංගලෝර් කණ්ඩායම මෙවරද තරගාවලිය විශිෂ්ට ජයග්රහණයකින් ආරම්භ කළා.
තරගයේ වීරයා ලෙස ජේකබ් ඩෆී නම් කළා.
