අබුඩාබි හීදී තුන්වන වරට පවත්වනු ලැබූ ILT20 තරගාවලිය ඊයෙ නිමාව ලැබුවා. ශූරතාවය දිනාගත්තේ ඩුබායි කැපිටල්ස් කණ්ඩායමයි ඒ ඩෙසර්ට් වයිපර්ස් කණ්ඩායමට එරෙහිවයි.
අවසන් තරගයේ කාසියෙ වාසිය දිනූ ඩුබායි කැපිටල්ස් කණ්ඩායමේ නායක සෑම් බිලිංග්ස් මුලින්ම පන්දු යැවීමට තීරණය කළා. ඒ අනුව ඩෙසර්ට් වයිපර්ස් කණ්ඩායම නියමිත පන්දුවාර 20 අවසානයේ කඩුලු 5ක් දැවී ලකුණු 189ක් ලබාගත්තා.
වයිපර්ස් කණ්ඩායම වෙනුවෙන් මැක්ස් හෝල්ඩන් පන්දු 51ට ලකුණු 76ක් හා නායක සෑම් කරන් පන්දු 33ට ලකුණු 62ක් ලබාගත්තා, පන්දු යැවීමේදී ඔබෙඩ් මැකෝයි කඩුලු 2ක් දවාගත්තා.
පිළිතුරු ඉනිම ක්‍රීඩා කළ ඩුබායි කැපිටල්ස් කණ්ඩායමේ මුල් කඩුලු 3 ලකුණු 31ට දවාගැනීමට වයිපර්ස් පන්දු යවන්නන් සමත් වුණා.
ඉන් අනතුරුව 4වන කඩුල්ල සඳහා පන්දු 53ට ලකුණු 80ක සබඳතාවයක් ගොඩ නැගීමට ෂායි හෝප්ස් සමගින් රොත්මන් පවෙල් සමත් වුණා.
ලකුණු 43ට හෝප්ස් දැවීගිය පසු පිටියට පිවිසි දසුන් ශානක පන්දු 10ට වේගවත් ලකුණු 21ක් රැස් කළේ දැවැන්ත හයේ පහර 2ක් ද සමගින්.
රොත්මන් පවෙල් ලකුණු 63ක් ලබා දැවීගිය පසු සිකන්දර් රාසා අනර්ඝ ඉනිමක් දියත් කරමින් පන්දු 12ට ලකුණු 34ක් ලබාගෙන තරගය ජයග්‍රහණය කරා රැගෙන ගියා.
ඒ අනුව ඩුබායි කැපිටල්ස් කණ්ඩායම පළමු වරට මේ ශූරතාවය දිනාගැනීමට සමත් වුණා. කැපිටල්ස් කණ්ඩායමේ ශ්‍රී ලංකාව නියෝජනය කරමින් දසුන් ශානක හා දුෂ්මන්ත චමීර ක්‍රීඩා කළා.
අවසන් තරගයට ක්‍රීඩා නොකළත් ඩෙසර්ට් වයිපර්ස් කණ්ඩායම වෙනුවෙන් වනිඳු හසරංග ක්‍රීඩා කළා.
