ලෝක කුසලාන පාපන්දු තරගාවලියේ සෙනගල් කණ්ඩායම සමග ඊයේ පැවති තරගය ජය ගැනීමට ප්‍රංශය සමත් වුණා. තරගය පැවැත්වුණේ, නිව්යෝර්ක් හිදී.
‘අයි’ කාණ්ඩය යටතේ පැවති තරගය නැරඹීමට 80,000 ක පමණ ප්‍රේක්ෂක පිරිසක් ක්‍රීඩාංගණයට පැමිණ සිටියා. පළමු අර්ධය නිමා වුණේ, දෙපිළම ගෝල වාර්තා කිරීමට පෙරයි.
අනතුරුව තරගයේ, 66 වැනි මිනිත්තුවේදී කිලියම් එම්බාපේ ප්‍රංශය වෙනුවෙන් පළමු ගෝලය වාර්තා කළා.
බ්‍රැඩ්ලි බාකෝලා 82 වැනි මිනිත්තුවේදී, ප්‍රංශය වෙනුවෙන් දෙවැනි ගෝලය ලබා ගත් අතර, සෙනගල කණ්ඩායම වෙනුවෙන් එකම ගෝලය වාර්තා කළේ, ඊබ්‍රහීම් බායේ ක්‍රීඩකයායි.
තරගය අවසන් වීමට මිනිත්තු කිහිපයක් තිබියදී කිලියන් එම්බාපේ ප්‍රංශය වෙනුවෙන් තවත් ගෝලයක් වාර්තා කළා. ඒ අනුව, ගෝල 3 ට 1 ක් ලෙස තරගය ජය ගත්තේ, ප්‍රංශ කණ්ඩායමයි.
