ආසියානු සත් සාමාජික රග්බි තරගාවලියේ දෙවැනි අදියරේ අවසන් පූර්ව වටයට සුදුසුකම් ලැබීමට ශ්‍රී ලංකා කණ්ඩායම සමත්වුණා.
කොළඹ තුරග තරග පිටියේදි පැවැත්වෙන තරගාවලියේ දෙවැනි දිනය අදයි.
තරගාවලියේ මූලික වටයේදි සී කාණ්ඩයෙන් තරග වදින ශ්‍රී ලංකා කණ්ඩායම තමන් සහභාගි වු තරග තුනෙහිම ජය හිමිකර ගත්තා.
පළමු තරගයෙන් ප්‍රතිවාදී උස්බෙකිස්තාන පිල පරාජය කළ ශ්‍රී ලංකා ක්‍රීඩකයින් දෙවන තරගයට ක්‍රීඩා කළේ සිංගප්පූරු කණ්ඩායම සමඟයි.
එහිදී ලකුණු 22 ට 5 ක් ලෙස ජය හිමිකර ගැනීමට ශ්‍රී ලංකා කණ්ඩායම සමත්වුණා.
ශ්‍රී ලංකා ක්‍රීඩකයින් ලකුණු රැස්කළේ උත්සහක දිනුම් 3 ක් සහ ගෝල දිනුමකින්.
ශ්‍රීනාත් සූරියබණ්ඩාර, දිනාල් ඒකනායක සහ හේෂාන් ජැන්සන් ශ්‍රි ලංකාව වෙනුවෙන් උත්සහක දිනුම් ලබාගත්තා.
එක් උත්සාහක දිනුමක් ගෝලයක් බවට පරිවර්තනය කිරීම සඳහා ප්‍රවර්ථනය සාර්ථක කරගනු ලැබුවේ ශ්‍රීනාත් සූරියබණ්ඩාර විසින්.
ඒ අනුව, ශ්‍රී ලංකා ක්‍රිඩකයින් තරගාවලියේ දෙවැනි අදියරේ අවසන් පූර්ව වටයට සුදුසුකම් ලබා ගත්තා.
ශ්‍රී ලංකා කණ්ඩායම අද උදේ සහභාගි වූයේ චීන කණ්ඩායම සමඟ තරගයකටයි.
එහි පළමු අර්ධය නිමා වනවිට ලකුණු 12 ට 7 ක් ලෙස පෙරමුණ ගැනීමට ශ්‍රී ලංකා කණ්ඩායම සමත්වුණා. දෙවැනි අර්ධයේදි තවත් ලකුණු 22 ක් රැස්කිරීමට ශ්‍රි ලංකා ක්‍රීඩකයින්ට හැකිවු අතර, ප්‍රතිවාදී චීන කණ්ඩායමට කිසිදු ලකුණක් රැස් කිරීමට හැකිවුයේ නැහැ.
ඒ අනුව ලකුණු 34 ට 7 ක් ලෙස තරගයේ ජය හිමිකර ගත්තේ ශ්‍රී ලංකා කණ්ඩායමයි. ඔවුන් ලකුණු රැස්කළේ ගෝල දිනුම් 2 ක් සහ උත්සාහක දිනුම් 3 කින්.
ශ්‍රි ලංකාව අද පස්වරුවේ ජපානය සමග අවසන් පූර්ව තරගයට ක්‍රීඩා කිරීමට නියමිතයි.
