ආසියානු සත් සාමාජික රග්බි තරගාවලියේ දෙවැනි අදියරේ පිරිමි අංශයේ තුන්වැනි ස්ථානය දිනා ගැනීමට ශ්‍රී ලංකා කණ්ඩායම සමත් වුණා.
එහි කාන්තා ශූරතාව ජපාන කණ්ඩායම විසින් දිනාගනු ලැබූ අතර, පිරිමි ශූරතාව හිමි කර ගත්තේ හොංකොං කණඩායමයි.
තරගාවලිය දින දෙකක් පැවැත්වුණේ, කොළඹ තුරග තරග පිටියේදී. මූලික වටයේදී සී කාණ්ඩයෙන් තරග කළ ශ්‍රී ලංකා ක්‍රීඩකයින් උස්බෙකිස්තානය, සිංගප්පූරුව සහ චීනය පරාජය කරමින් අවසන් පූර්ව වටයට පිවිසියා.
ශ්‍රී ලංකා ක්‍රීඩකයින් අවසන් පූර්ව වටයේදී ආසියාවේ ප්‍රබලතම රග්බි කණ්ඩායම වන ජපාන කණ්ඩායම සමග තරග වැදුනා.
එහිදී තියුණු තරගයකින් පසු ලකුණු 15 ට 12 ක් ලෙස ශ්‍රී ලංකා කණ්ඩායම පරාජයට පත් වුණා. ඒ අනුව, ශ්‍රී ලංකා ක්‍රීඩකයින් තුන්වැනි ස්ථානය සඳහා තරග වැදුනේ චීන කණ්ඩායම සමගයි.
එහි පළමු අර්ධය නිමා වන විට ලකුණු 7 ට 7 ක් ලෙස දෙපිලම සම තත්වයේ පසු වුණා. දෙවැනි අර්ධයේදී ශ්‍රී ලංකා කණ්ඩායම තවත් ලකුණු 12 ක් රැස් කළ අතර, චීන කණ්ඩායම ලකුණු 7 ක් ලබා ගත්තා.
ඒ අනුව ලකුණු 19 ට 14 ක් ලෙස තරගය ජයගත් ශ්‍රී ලංකා කණඩායමට තරගාවලියේ තුන්වැනි ස්ථානය හිමි වුණා. ශ්‍රී ලංකා කණ්ඩායම ලකුණු රැස් කළේ, ගෝල දිනුම් දෙකක් සහ උත්සහක දිණුමකින්.
