2025 ජුනි මස 27 වනදා සිට ජූලි මස 04 වනදා තෙක් රටවල් 11ක සහභාගීත්වයෙන් දකුණු කොරියාවේදී පැවැත්වීමට නියමිත‘2025 ආසියානු යොවුන් නෙට්බොල් (දැල්පන්දු) ශූරතාවලිය’ සඳහා පිටත්ව යන ශ්‍රී ලංකා යොවුන් නෙට්බොල් කණ්ඩායම අද (20) වන දින තරුණ කටයුතු සහ ක්‍රීඩා අමාත්‍යංශයේ දී තරුණ කටයුතු හා ක්‍රීඩා අමාත්‍ය සුනිල් කුමාර ගමගේ හමුවිය.
එහිදි අමාත්‍යවරයා, ඔවුන්ට ජයග්‍රහණය සඳහා දිරිගැන්වීම් සමඟ සුබ පැතුම් එක් කළ අතර, ඔවුන් සමඟ සුහද පිළිසඳරක ද යෙදුණි.
මෙම අවස්ථාවට ක්‍රීඩා නියෝජ්‍ය අමාත්‍ය සුගත් තිලකරත්න, ක්‍රීඩා සංවර්ධන දෙපාර්තමේන්තුවේ අධ්‍යක්ෂ ජනරාල් ෂෙමාල් ප්‍රනාන්දු, ක්‍රීඩා වෛද්‍ය ආයතනයේ අධ්‍යක්ෂ ජනරාල් ලාල් ඒකනායක, දැල්පන්දු පුහුණුකාරිනී හයිසින්ත් විජේසිංහ ඇතුළු පිරිසක් සහභාගී වූහ.
