චීනයේ සැන්යා හි පැවැති 6 වන ආසියානු වෙරළ ක්‍රීඩා උළෙලේදී මලල ක්‍රීඩා අංශයෙන් පදක්කම් 4ක් දිනා ගනිමින් ශ්‍රී ලංකාවට අභිමානයක් අත්කර දුන් මලල ක්‍රීඩා කණ්ඩායම (අප්‍රේල් 27) කටුනායක ජාත්‍යන්තර ගුවන් තොටුපළින් දිවයිනට පැමිණියහ.
මෙම තරගාවලියේදී ශ්‍රී ලංකාව වෙනුවෙන් රිදී පදක්කමක් සහ ලෝකඩ පදක්කම් 3ක් දිනා ගැනීමට අපේ ක්‍රීඩක ක්‍රීඩිකාවන් සමත් විය.
පදක්කම් ලාභීන්ගේ දක්ෂතා
ඉෂාරා සමන්මලී: කාන්තා දුර පැනීමේ ඉසව්වෙන් මීටර් 5.87ක දක්ෂතාවයක් දක්වමින් රිදී පදක්කම දිනා ගත්තාය. මෙය ආසියානු වෙරළ ක්‍රීඩා ඉතිහාසයේ ශ්‍රී ලංකාව මලල ක්‍රීඩා අංශයෙන් දිනාගත් ප්‍රථම රිදී පදක්කම ලෙස ඉතිහාසයට එක්විය.
ශෂිකලා ලංකාතිලක: කාන්තා දුර පැනීමේ ඉසව්වෙන් මීටර් 5.83ක දක්ෂතාවයක් සමඟින් ලෝකඩ පදක්කම දිනා ගත්තාය.
ජයත්‍ර සම්පත් මිරැන්ඩා: පිරිමි දුර පැනීමේ ඉසව්වෙන් මීටර් 7.37ක දක්ෂතාවයක් දක්වමින් ලෝකඩ පදක්කම දිනා ගැනීමට සමත් විය.
පිරිමි 4x60m සහය දිවීමේ කණ්ඩායම: මනුජ ප්‍රභාෂ්, මලිත් තමෙල්, මලිත් තරුෂාන් සහ සඳුන් දියලවත්ත යන ක්‍රීඩකයින්ගෙන් සැදුම්ලත් කණ්ඩායම තත්පර 27.57ක කාලයකින් තරගය නිම කරමින් ලෝකඩ පදක්කම මෙරටට හිමිකර දුන්හ.
ජයග්‍රාහී ක්‍රීඩක ක්‍රීඩිකාවන් පිළිගැනීම සඳහා ක්‍රීඩා සංවර්ධන දෙපාර්තමේන්තු අධ්‍යක්ෂ ජනරාල් එස්. අචුතන් මහතා සහ ශ්‍රී ලංකා ජාතික ඔලිම්පික් කමිටුවේ (NOC) නිලධාරීන් පිරිසක් එක්ව සිටියහ. ජාතික ඔලිම්පික් කමිටුවේ ලේකම් ජනරාල් රිෆ්ඩි ෆාමි මහතා, මලල ක්‍රීඩා කොමිසමේ සභාපති ඔලිම්පියන් නිලුක කරුණාරත්න මහතා ඇතුළු පිරිසක් මෙම අවස්ථාවට සහභාගී වෙමින් ක්‍රීඩක ක්‍රීඩිකාවන් දිරිමත් කළහ.
