2025 වසරේ පැවති යුරෝ ෆෝමියුලා (Euro formula Open) ශූරතාවලියේ රූකි ශූරතාව (Rookie Championship) දිනා ගනිමින් සමස්ත තරගාවලියේ දෙවන ස්ථානය හිමිකර ගත් ප්‍රථම ශ්‍රී ලාංකිකයා බවට පත් වූ තරුණ රේසිං ශූර යෙවන් ඩේවිඩ්, අද (දෙසැම්බර් 11) දින යෞවන කටයුතු සහ ක්‍රීඩා අමාත්‍යාංශයේදී අමාත්‍ය සුනිල් කුමාර ගමගේ හමු විය.
මේ ඓතිහාසික ජයග්‍රහණයේ සංකේත ලෙස තමන් දිනා ගත් කුසලාන ශ්‍රී ලංකාවේ ජනතාවට අයිති යැයි පවසමින්, යෙවන් ඩේවිඩ් විසින් ඒවා ගෞරවයෙන් යුතුව අමාත්‍යවරයා වෙත භාර දෙන ලදී.
මෙම හමුවෙන් පසු අදහස් දැක්වූ ගරු අමාත්‍ය සුනිල් කුමාර ගමගේ, යෙවන් ඩේවිඩ්ගේ විශිෂ්ට ජයග්‍රහණය ශ්‍රී ලංකාවට අතිමහත් ගෞරවයක් ගෙන දුන් බවත්, තරුණ ක්‍රීඩකයන්ට රජයේ පූර්ණ සහගෝගය අඛණ්ඩව ලබා දෙන බවත් අවධාරණය කළේය.
වසර 2025 යුරෝෆෝමියුලා ඕපන් ශූරතාවලියේදී ඔහු දැක්වූ විශිෂ්ට දක්ෂතා හේතුවෙන්, යෙවන් ඩේවිඩ් මේ වන විට 2026 වසරේ FIA Formula 3 තරගාවලියට පිවිසීම සඳහා සූදානම් වෙමින් සිටී. මෙමගින් ඔහු, ලොව ඉහළම තලයේ මෝටර් රථ ධාවන තරග සඳහා සහභාගී වන ප්‍රථම ශ්‍රී ලාංකිකයා බවට ද පත් වනු ඇත.
