නවසීලන්තය හා සංචාරක ඕස්ට්‍රේලියානු කණ්ඩායම අතර තරග 3කින් සමන්විත චැපල්-හැඩ්ලී 20-20 තරගාවලියේ පළමු තරගයෙන් කඩුලු 6ක ජයක් ලැබීමට ඕස්ට්‍රේලියානු කණ්ඩායම සමත්වුණා.
කාසියේ වාසිය දිනූ ඕස්ට්‍රේලියානු නායකයා මුලින්ම පන්දු යැවීමට තීරණය කළා.
ඒ අනුව මුලින් පන්දුවට පහරදුන් නවසීලන්ත කණ්ඩායම පන්දුවාර 20 අවසානයේ කඩුලු 6ක් දැවී ලකුණු 181ක් ලබාගත්තා.
නවසීලන්තයේ මුල් කඩුලු 3ම ලකුණු 6ට දැවී ගිය පසු මෙම ලකුණු ප්‍රමාණය ලබාගැනීමට හැකිවීම සුවිශේෂියි.
එම ලකුණු ප්‍රමාණය ලබාගැනීමේ සම්පූර්ණ ගෞරවය හිමිවිය යුත්තේ නොදැවී පන්දු 66ට ලකුණු 106ක් ලබාගත් ටිම් රොබින්සන් හටයි.
රොබින්සන්ගේ ඉනිමට හයේ පහර 5ක් සහ හතරේ පහර 6ක් ඇතුලත් වුණා.
රොබින්සන්ගේ ඉනිමට සහය දක්වමින් ඩැරල් මෙචෙල් ලකුණු 34ක් ලබාගත්තා.
පන්දු යැවීමේදී බෙන් ද්වාෂියස් කඩුලු 2ක් හා ජොස් හේසල්වුඩ් එක් කඩුල්ලක්ද, මැතිව් ෂෝර්ට් එක් කඩුල්ලක්ද දවාගත්තා.
පිළිතුරු ඉනිම ක්‍රීඩා කළ ප්‍රභල ඕස්ට්‍රේලියානු පිතිකරුවන් කඩුලු 4ක් පමණක් දැවී පන්දුවාර 16යි පන්දු 3කදී ලකුණු 185ක් ලබාගෙන තරගය ජයග්‍රහණය කළා.
මිචෙල් මාෂ් පන්දු 43ට ලකුණු 85ක් ලබාගත් අතර ට්‍රැවිස් හෙඩ් පන්දු 18ට ලකුණු 31ක් ලබාගත්තා.
පන්දුයැවීමේදී නවසීලන්තය වෙනුවෙන් මැට් හෙන්රි කඩුලු 2ක් දවාගත් අතර සැකරි ෆෝල්ක්ස් හා කායිල් ජේම්සන් එක් කඩුල්ල බැගින් දවාගත්තා.
තරගයේ වීරයා වුයේ මිචෙල් මාෂ්.
මේ අනුව චැපල්-හැඩ්ලි තරගාවලියේ පළමු තරගය ජයගත් ඕස්ට්‍රේලියාව තරග 1-0ක් ලෙස ඉදිරියෙන් සිටිනවා.
