නැගීඑන ආසියානු කුසලාන තරගාවලියේ අවසන් පූර්ව තරග ඊයේ පැවැත්වුණා. පළමු අවසන් පූර්ව තරගයෙන් ඉන්දියා A කණ්ඩායම පරදා බංග්ලාදේශ A කණ්ඩායමත්, දෙවන තරගයෙන් ශ්‍රී ලංකා A කණ්ඩායම පරදා පාකිස්තාන් ශහීන්ස් කණ්ඩායමත් ජයග්‍රහණය කළා.
පලමු අවසන් පූර්ව තරගය වූ ඉන්දියාව හා බංග්ලාදේශය අතර තරගය තීරණය වූයේ සුපිරි පන්දුවාරයක් මගින්.
මෙම තරගයේ මුලින්ම පන්දුවට පහරදුන් බංග්ලාදේශ A කණ්ඩායම කඩුලු 6ට ලකුණු 194ක් ලබාගත්තා. එයට පිලිතුරු වශයෙන් ඉන්දීය A කණ්ඩායමටද ලබාගැනීමට හැකිවුණේ කඩුලු 6ට ලකුණු 194ක් පමණයි.
ඒ අනුව තරගය සුපිරි පන්දුවාරයක් දක්වා දිගු වූ අතර, මුලින් පන්දුවට පහරදුන් ඉන්දීය A කණ්ඩායමේ කඩුලු 2ම කිසිදු ලකුණක් නොලබා දැවී ගිය අතර බංග්ලාදේශ A කණ්ඩායමට ජයග්‍රහණය සඳහා අවශ්‍යය වූයේ එක ලකුණක් පමණයි.
එහිදී බංග්ලාදේශ A කණ්ඩායමේද කඩුල්ලක් දැවී ගිය අතර යැවූ වයිඩ් පන්දුවකින් බංග්ලාදේශයේ ජය තහවුරු වුණා.
දෙවන අවසන් පූර්ව තරගය පැවතුණේ ශ්‍රී ලංකා A කණ්ඩායමත්, පාකිස්තාන් ශහීන්ස් කණ්ඩායමත් අතරයි. එහිදී මුලින් පන්දුවට පහර දුන් පාකිස්තාන් කණ්ඩායම කඩුලු 9ක් දැවී ලකුණු 153ක් ලබාගත්තා.
පිලිතුරු ඉනිම ක්‍රීඩා කළ ශ්‍රී ලංකා A කණ්ඩායම හොඳ ආරම්භයක් ලබාගත්තද පන්දුවාර 20 අවසානයේ ලබාගැනීමට හැකිවුණේ සියලු කඩුලු දැවී ලකුණු 148ක් පමණයි. මිලාන් රත්නායක සටන්කාමී ඉනිමක් දියත් කරමින් ලකුණු 40ක් ලබාගත්තා.
ඒ අනුව නැගීඑන ආසියානු කුසලාන ශූරතාවයේ අවසන් මහා තරගය සඳහා සුදුසුකම් ලැබවේ, බංග්ලාදේශ් A කණ්ඩායමත් පාකිස්තාන් ශහීන්ස් කණ්ඩායමත් ය. අවසන් මහා තරගය හෙට පැවැත්වෙනු ඇත.
