එංගලන්තය හා ඕස්ට්‍රේලියාව අතර පැවැත්වෙන දෙවන අළු බඳුන තරගාවලියේ තුන්වන දිනය අවසානයේ එංගලන්ත දෙවනි ඉනිම කඩුලු 6ක් දැවී ඕස්ට්‍රේලියාවට වඩා තවත් ලකුණු 43ක් පසුපසින් සිටිනවා.
තුන්වන දිනය ආරම්භ වන විට ඕස්ට්‍රේලියානු කණ්ඩායම සිය පළමු ඉනිමට කඩුලු 6ක් දැවී ලකුණු 378ක් ලබාගෙන සිටියා. දිනයේ දෙවන සැසියේදී ඕස්ට්‍රේලියානු කන්ඩායමේ පළමු ඉනිමේ සියලු කඩුලු ලකුණු 511ට දැවී ගියා.
ඕස්ට්‍රේලියානු පළමු ඉනිම වෙනුවෙන් ජේක් වෙදරල්ඩ් ලකුණු 72ක්, මානස් ලබුෂේන් ලකුණු 65ක්, ස්ටීවන් ස්මිත් ලකුණු 61ක් ඇලෙක්ස් කැරී ලකුණු 63ක් හා මිචෙල් ස්ටාර්ක් ලකුණු 77ක් ලබාගත්තා. පන්දු යැවීමේදී එංගලන්තය වෙනුවෙන් බ්‍රයිඩන් කාස් කඩුලු 4ක් හා බෙන් ස්ටෝක්ස් කඩුලු 3ක් දවාගත්තා.
එංගලන්තය සිය දෙවනි ඉනිම ආරම්භ කළේ ඕස්ට්‍රේලියාවට වඩා ලකුණු 177ක් පසුපසින් සිටිමින්. දිනයේ තුන්වන තරග සැසියේදී එංගලන්ත දෙවනි ඉනිමේ කඩුලු 6ක් ලකුණු 134ට දවාගැනීමට ඕස්ට්‍රේලියානු පන්දු යවන්නන් සමත් වුණා.
සැක් ක්‍රෝලි ලකුණු 44යි. මිචෙල් ස්ටාර්ක්, මයිකල් නෙසර් හා ස්කොට් බොලන්ඩ් ඕස්ට්‍රේලියාව වෙනුවෙන් කඩුලු 2 බැගින් ලබාගත්තා.
ඒ අනුව තුන්වන දිනය අවසානයේ එංගලන්ත කණ්ඩායම තවත් කඩුලු 4ක් අතැතිව ලකුණු 43ක් පිටුපසින් සිටිනවා. මේ වන විට බෙන් ස්ටෝක් හා විල් ජැක්ස් කඩුල්ලේ රැඳී සිටිනවා.
