සංචාරක පාකිස්තානු කණ්ඩායම හා බංග්ලාදේශය අතර තරග 3කින් සමන්විත එක්දින තරගාවලියේ දෙවන එක්දින තරගය ඊයේ මිර්පුර් හිදී පැවැත්වුණා. එම තරගය ලකුණු 128කින් ජයගැනීමට සමත් වුණේ පාකිස්තාන් කණ්ඩායමයි.
කාසියේ වාසිය දිනූ බංග්ලාදේශය මුලින්ම පන්දුවට පහර දීම සඳහා පාකිස්තානයට ආරාධනා කළා. ඒ අනුව මුලින් පන්දුවට පහර දුන් පාකිස්තානය සියලු දෙනා දැවී ලකුණු 274ක් ලබාගත්තා.
සාර්ථක ආරම්භයක් ලබාගත් පාකිස්තානු ආරම්භක පිතිකරුවන් වන මාස් සදාකට් හා ශහීබ්සාදා ෆර්හාන් පලමු කඩුල්ලට ලකුණු 103ක සබඳතාවයක් ගොඩනැගුවා.
ප්‍රවේගකාරී පිතිකරණයක නියැළුණු මාස් සදකට් පන්දු 46ට ලකුණු75ක් ලබාගැනීමට සමත් වූ අතර ෆර්හාන් ලකුණු 31ක් ලබගත්තා.
අවාසනාවන්ත ලෙස දුවද්දී දැවීගිය සල්මන් අලී අගා ලකුණු 64ක් හා මොහොමඩ් රිස්වාන් ලකුණු 44ක් ලබාගත්තා.
බංග්ලාදේශ කණ්ඩායම වෙනුවෙන් රිෂාඩ් හුසේන් කඩුලු 3ක් හා මෙහෙදි හසන් මිරාස් කඩුලු 2ක් දවාගත්තා.
පිලිතුරු ඉනිම ක්‍රීඩා කළ බංග්ලාදේශ කණ්ඩායමේ පළමු කඩුලු 3 දැවී ගියේ ලකුණු 15ටයි. අයහපත් කාළගුණය නිසා 7වන පන්දුවාරයේදී තරගය මදකට නතර කළ අතර නැවත තරගය ආරම්භ වූයේ ඩක්වත් ලුවිස් ක්‍රමයට අනුව ලබාගත යුතු ලකුණු ඉලක්කය වෙනස් කරමිනුයි.
ඒ අනුව තරගය ජයගැනීම සඳහා බංග්ලාදේශ කණ්ඩායමට පන්දුවාර 32දී ලකුණු 243ක් ලබාගැනීමට අවශ්‍යය වුණා.
කෙසේ වෙතත් 24 වන පන්දුවාරය වන විට බංග්ලාදේශ කණ්ඩායමේ සියලු කඩුලු ලකුණු 114ට දැවී ගියා. ලිටන් දාස් ලකුණු 41ක් හා තව්හිද් හ්‍රිදෝයි ලකුණු 28ක් ලබාගත්තා.
පන්දු යැවීමේදී පාකිස්තානය වෙනුවෙන් මාස් සදාකට් හා හාරිස් රවූෆ් කඩුලු 3 බැගින් දවාගත් අතර ශහීන්ෂා අෆ්‍රීඩි කඩුලු 2 ක් දවාගත්තා.
මෙම තරගාවලියේ පළමු තරගය බංග්ලාදේශය ජයගත් අතර දෙවන එක්දින තරගය ලකුණු 128කින් පාකිස්තනය ජයගෙන තරගාවලිය 1-1ක් ලෙස සම තත්වයට පත්කළා.
