ශ්‍රී ලංකාව සමග පැවැති 20 -20 ක්‍රිකට් තරගාවලිය තරග 2 ට 1 ක් ලෙස ජය ගැනීමට බංග්ලාදේශය සමත් වුණා. බංග්ලාදේශය ශ්‍රී ලංකාව සමග පැවැති 20 – 20 තරගාවලියක් ජය ගත්තේ පළමු වරටයි.
තුන්වැනි තරගය බංග්ලාදේශය ජය ගත්තේ කඩුලු 8 කින්.
ශ්‍රී ලංකා කණ්ඩායම සහ බංග්ලාදේශ කණ්ඩායම අතර 20-20 ක්‍රිකට් තරගාවලියේ ශූරයින් තීරණය කෙරුණු තුන්වැනි තරගය පැවැත්වුණේ කොළඹ ආර් ප්‍රේමදාස ක්‍රීඩාංගණයේදී.
තරගයේ කාසියේ වාසිය දිනා ගත් ශ්‍රී ලංකා කණ්ඩායම පළමුවෙන් පන්දුවට පහර දීමට තීරණය කළා.
ඉනිම ආරම්භ කලේ පැතුම් නිස්සංක සහ කුසල් මෙන්ඩිස්. ආරම්භක කඩුල්ලේ සබධතාව ලකුණු 14 ක් වන විට කුසල් මෙන්ඩිස් ලකුණු 6 කට දැවී ගියා.
කුසල් පෙරේරා ලකුණු නොළඹා දැවී ගිය අතර දීනේෂ් චන්දිමාල් ලකුණු 4 යි. චරිත් අසලංක ලකුණු 3 කට දැවී ගියා.
ලකුණු 46 ක් රැස් කර ගෙන සිටි පැතුම් නිස්සංක දැවී ගියේ ශ්‍රී ලංකා ඉනිමේ 5 වැනි කඩුල්ල ලෙසයි. ඔහුගේ ඉනිමට 4 පහර ක් ඇතුලත්. කමිදු මෙන්ඩිස් ලකුණු 21 යි.
ශ්‍රී ලංකා කණ්ඩායම පන්දු වාර 20 ඇතුළත කඩුලු 7 ක් දැවී ලකුණු 132 ක් රැස් කළා.
දසුන් ශානක නොදැවී ලකුණු 32 යි.පන්දු 25 කදී ගොඩ නැගුණු ඔහුගේ ඉනිමට 4 පහර 4 ක් සහ 6 පහර දෙකක් ඇතුලත්.
පන්දු යැවීමේදී මෙහෙදි හසන් පන්දු වාර 4 කදී ලකුණු 11 කට කඩුලු 4 ක් දවා ගත්තා.
තරගයේ ජයග්‍රහණය සදහා ලකුණු 133 ක ඉලක්කයක් සමග බංග්ලාදේශ ඉනිම ආරම්භ කලේ පර්වේස් හොසේන් සහ ටන්සිඩ හසන්.
ඉනිමේ පළමු පන්දුවේදීම පර්වේස් හොසේන් දවා ගැනීමට නුවන් තුෂාර සමත් වුණා. ලිටන් ඩාස් ලකුණු 32 යි.
බංග්ලාදේශ කණ්ඩායම තරගය ජය ගත්තේ පන්දු වාර 16 යි පන්දු 2 කදී කඩුලු 2 ක් දැවී තිබියදීයි. ටන්සිඩ් හසන් නොදැවී ලකුණු 73 ක් රැස් කළා. ඔහුගේ ඉනිමට 4 පහරක් සහ 6 පහර 6 ක් ඇතුලත්.
