2026 අගෝස්තු මාසයේ අයි සී සී ක්‍රීඩකයා ලෙස ශ්‍රී ලංකා ක්‍රිකට් ක්‍රීඩක සොනාල් දිනූෂ නම් කර තිබෙනවා.
ඔහුට මෙම සම්මානය හිමි වූ පළමු අවස්ථාව මෙයයි.
ලෝක ටෙස්ට් ශූරතා තරගාවලිය යටතේ පසුගියදා පැවති තරග දෙකකින් සමන්විත ඉන්දියා – ශ්‍රී ලංකා ටෙස්ට් තරගාවලියේදී, ශ්‍රී ලංකාව වෙනුවෙන් වැඩිම ලකුණු රැස් කළ ක්‍රීඩකයා බවට සොනාල් දිනූෂ පත් වුණා.
එම තරගාවලියේදී ඔහු ලකුණු 420 ක් රැස් කළා. ඔහුගේ ලකුණු සාමාන්‍ය 140 ක්.
එම ලකුණු 420ට ශතක තුනක් සහ අර්ධ ශතකයක් ඇතුළත්.
පළමු ටෙස්ට් තරගයේදී ශ්‍රී ලංකා කණ්ඩායම ලකුණු 165 කින් පරාජය වුවද, සොනාල් දිනූෂ පළමු ඉනිමේදී ලකුණු 100 ක් රැස් කිරීමට සමත් වුණා.
එහි දෙවැනි ඉනිමේදී ද ඔහු ලකුණු 84 ක් ලබා ගත්තා.
ඉන්දියාව සමග පැවති දෙවැනි ටෙස්ට් ක්‍රිකට් තරගයේදී ද සොනාල් දිනූෂ පළමු ඉනිමේදී ලකුණු 103 ක් සහ දෙවැනි ඉනිමේදී නොදැවී ලකුණු 133 ක් ලබා ගනිමින්, ටෙස්ට් තරගයක ඉනිම් දෙකකදී ශතක රැස් කළ 8 වැනි ශ්‍රී ලාංකික ක්‍රිකට් ක්‍රීඩකයා ලෙස වාර්තා අතරට එක් වුණා.
එමෙන්ම, තරග දෙකක ටෙස්ට් තරගාවලියකදී ශතක තුනක් රැස් කළ තෙවැනි ශ්‍රී ලාංකික ක්‍රිකට් ක්‍රීඩකයා ලෙසද ඔහු වාර්තා අතරට එක් වුණා.
පසුගිය වසරේ බංග්ලාදේශයට එරෙහිව පැවති ටෙස්ට් ක්‍රිකට් තරගාවලියේදී සොනාල් දිනූෂ ටෙස්ට් වරම් හිමි කර ගත්තා.
ඉන්දියා ශ්‍රී ලංකා ටෙස්ට් තරගයට පෙර ටෙස්ට් තරග තුනකට පමණක් ක්‍රීඩා කර තිබූ සොනාල් දිනූෂ, කෙටි කලක් තුළ ශ්‍රී ලංකා ටෙස්ට් කණ්ඩායම වෙනුවෙන් විශිෂ්ට දක්ෂතා දැක්වීමට සමත්ව තිබෙනවා.
