සංචාරක ශ්‍රී ලංකා කණ්ඩායම හා සිම්බාබ්වේ කණ්ඩායම අතර තරග 3කින් සමන්විත 20-20 තරගාලියේ දෙවන තරගය අද හරාරේ නුවරදී පැවැත්වීමට නියමිතයි.
ශ්‍රී ලංකා කණ්ඩායමේ සිම්බාබ්වේ සංචාරය සැලසුම් කොට තිබුණේ එක්දින තරග 2ක් හා විස්සයි විස්ස තරග 3ක් ලෙසට‍යි.
එක්දින තරගාවලිය මේ වන විට ක්‍රීඩා කොට අවසන් අතර එම තරගාවලිය 2-0ක් ලෙස ශ්‍රී ලංකා කණ්ඩායම ජයග්‍රහණය කළා.
විස්සයි විස්ස තරගාවලියේ පළමු තරගය පසුගිය 3න් වනදා පැවැත්වුණු අතර එම තරගය කඩුලු 4කින් ජයගැනීමට ශ්‍රී ලංකා කණ්ඩායම සමත් වුණා.
පළමු තරගය ශ්‍රී ලංකා කණ්ඩායම ජයගත්තද සිම්බාබ්වේ කණ්ඩායම විසින් ශ්‍රී ලංකාවට දැඩි අභියෝගයක් එල්ල වුණා.
එම තරගයේ මුලින්ම පන්දුවට පහරදුන් සිම්බාබ්වේ කණ්ඩායම ලකුණු 175ක් ලබාගත්තා.
එම ඉලක්කය සපුරා ගැනීමට ශ්‍රී ලංකා කණ්ඩායමට අවසන් පන්දුවාරය දක්වා සටන් කිරීමට සිදුවුණා.
ශ්‍රී ලංකා කණ්ඩායමේ කමිඳු මෙන්ඩිස්ගේ අනර්ඝ ඉනිම නොවන්නට මෙම තරගයේ ප්‍රතිඵලය වෙනස් වීමට ඉඩ තිබුණා.
කෙසේ වෙතත් අද තරගයට ශ්‍රී ලංකා කණ්ඩායම සහභාගී වන්නේ ජයග්‍රාහී මානසිකත්වයකින්.
එසේම සිම්බාබ්වේ කණ්ඩායමද අද තරගයේදී පෙර තරගයේ සිදුවූ අඩුපාඩු මගහරවා ගනිමින් තරගයට ප්‍රවිශ්ට වනු ඇත.
තරගය ආරම්භ වන්නේ ශ්‍රී ලංකා වේලාවෙන් පස්වරු 5ට යි.
