සංචාරක ඕස්ට්‍රේලියා කණ්ඩායම හා පාකිස්තානය අතර තරග 3කින් සමන්විත එක්දින තරගාවලියේ අවසන් තරගය ඊයේ ලාහෝර් හීදී පැවැත්වුණා. එම තරගය කඩුලු 4කින් ජයගත් පාකිස්තානය එක්දින තරගාවලියද තරග 2-1ක් ලෙස ජයගැනීමට සමත් වුණා.
පන්දු යවන්නන්ට පාරාදීසයක් වූ ලාහෝර් පිටියේ පළමුවට පන්දුවට පහරදීමට ඕස්ට්‍රේලියානු නායක ජොශ් ඉංලිස් තීරණය කළා. පාකිස්තානු පන්දු යවන්නන්ගෙන් එල්ල වුණු දැඩි අභියෝගය හමුවේ ඕස්ට්‍රේලියානු ඉනිමේ සියලු කඩුලු ලකුණු 157ට දැවී ගියා.
ඕස්ට්‍රේලියාව වෙනුවෙන් යම් සාර්ථකත්වයක් දැක්වූ එකම පිතිකරුවා වූ ජොශ් ඉංග්ලිස් ලකුණු 65ක් ලබාගත්තා.
පන්දු යැවීමේදී ෂහීන් ෂා අෆ්‍රීඩි කඩුලු 3ක් දවාගත් අතර අබ්‍රාර් අහමඩ් හා ශදාබ් කාන් කඩුලු 2 බැගින් දවාගත්තා.
පිලිතුරු ඉනිම ක්‍රීඩා කළ පාකිස්තාන් කණ්ඩායම 42 වන පන්දුවාරයේදී කඩුලු 6ක් පමණක් දැවී ලකුණු 161ක් ලබාගෙන තරගයේ ජයග්‍රහණය ලබාගත්තා.
පාකිස්තානු ඉනිම වෙනුවෙන් බාබර් අසාම් ලකුණු 40ක් ශදාබ් කාන් නොදැවී ලකුණු 29ක් හා මාස් සදාකත් ලකුණු 27ක් ලබාගත්තා.
ඕස්ට්‍රේලියාව වෙනුවෙන් මැතිව් කුනමන් කඩුලු 3ක් හා නේදන් එලිස්, මැතිව් ෂෝර්ට්, මැට් රේන්ෂෝ එක් කඩුල්ල බැගින් දවාගත්තා.
මේ තරගාවලියේ පළමු තරගය පාකිස්තානයත්, දෙවන තරගය ඕස්ට්‍රේලියාවත් ජයගත්තා. ඒ අනුව මෙම ජයග්‍රහනයත් සමග තරග 2-1ක් ලෙස තරගාවලිය ජයගැනීමට පාකිස්තානය සමත් වුණා.
අවසන් තරගයේ වීරයා ලෙස ශහීන් ෂා අෆ්‍රීඩි නම් කෙරුණු අතර තරගාවලියේ වීරයා ලෙස නම් වූයේ අරෆත් මින්හාස්.
