ලෝක කුසලාන 20-20 ක්‍රිකට් තරගාවලියේ මූලික වටයේ ශ්‍රී ලංකාව සහභාගිවන අවසන් තරගය අද පැවැත්වෙනවා. ඒ සිම්බාබ්වේ කණ්ඩායම සමගයි. තරගය පස් වරු තුනට ආරම්භ වීමට නියමිතයි.
තරගාවලියේ ඉදිරි තරග සඳහා වේග පන්දු යවන ක්‍රීඩක ඩිල්ෂාන් මධුශංක ශ්‍රී ලංකා කණ්ඩායමට කැඳවා තිබෙනවා. අන්තර්ජාතික ක්‍රිකට් කවුන්සිලයේ තරගාවලි තාක්ෂණික කමිටුව ඊට අනුමැතිය පළකළා.
ඩිල්ෂාන් මධුශංක කණ්ඩායමට කැඳවා ඇත්තේ ඕස්ට්‍රේලියාව සමග පැවති තරගයේදි ආබාධයට ලක්වු වේග පන්දු යවන ක්‍රීඩක මතීෂ පතිරණ වෙනුවටයි.
මෙවර තරගාවලියේදි ශ්‍රි ලංකා කණ්ඩායමෙන් ඉවත් කෙරුණූ දෙවැනි ක්‍රීඩකයා වන්නේ මතීෂ පතිරණයි. මීට පෙර වනිදු හසරංගද ආබාධයක් හේතුවෙන් තරගාවලියෙන් ඉවත් කෙරුණා.
ශ්‍රී ලංකාව සහ සිම්බාබ්වේ කණ්ඩායම් මූලික වටය යටතේ බී කාණ්ඩයෙන් තරග වැදුණා. ශ්‍රී ලංකාව එහිදී අයර්ලන්තය, ඕමානය සහ ඕස්ට්‍රේලියාව පරාජය කිරීමට සමත්වුණා. සිම්බාබ්වේ කණ්ඩායම මූලික වටයේදි ඕමානය, සහ ඕස්ට්‍රේලියාව පරාජය කළ අතර, අයර්ලන්තය සමගපැවති තරගය වර්ෂාව හේතුවෙන් අතහැර දැමුණා.
ශ්‍රී ලංකාව සහ සිම්බාබ්වේ අතර, අන්තර්ජාතික 20-20 තරග 11 ක් පවත්වා තිබෙනවා. ඉන් තරග 8 ක් ශ්‍රී ලංකාවත්, තරග 3 ක් සිම්බාබ්වේ කණ්ඩායමත් ජයගත්තා. 20-20 ලෝක කුසලානයකදි ශ්‍රී ලංකාව සහ සිම්බාබ්වේ අතර තරගයක් පැවැත්වෙන්නේ 2012 වසරෙන් පසුවයි.
ශ්‍රී ලංකාව සහ සිම්බාබ්වේ කණ්ඩායම් විස්සයි විස්ස ලෝක කුසලානයකදී තරග වදින්නේ තුන්වැනි වරටයි. මීට පෙර පැවති තරග දෙකෙන්ම ශ්‍රී ලංකාව ජය වාර්තා කළා.
