ලෝක කුසලාන 20-20 ක්‍රිකට් තරගාවලියේ ශ්‍රී ලංකාව සිම්බාබ්වේ කණ්ඩායම් අතර පැවැති තරගය කඩුලු 6 කින් ජය ගැනීමට සිම්බාබ්වේ කණ්ඩායම සමත් වුණා. තරගය පැවැත්වුණේ කොළඹ ආර් ප්‍රේමදාස ක්‍රීඩාංගණයේදී.
තරගයේ කාසීයේ වාසිය හිමි කර ගත්තේ ශ්‍රී ලංකා කණ්ඩායමයි. ඔවුන් පළමුවෙන් පන්දුවට පහර දීමට තීරණය කළා.
ඒ අනුව ශ්‍රී ලංකා ඉනිම ආරම්භ කලේ පැතුම් නිස්සංක සහ කුසල් ජනිත් පෙරේරා. ආරම්භක කඩුල්ලේ සබධතාව ලකුණු 54 ක්වන විට කුසල් ජනිත් පෙරේරා ලකුණු 22 ක‌ට දැවී ගියා. කුසල් මෙන්ඩිස් ලකුණු 14 යි.
පැතුම් නිස්සංක තම 20 -20 ක්‍රිකට් දිවියේ 19 වැනි අර්ධ ශතකය අද වාර්තා කළා. ඔහු ලකුණු 62 ක් රැස් කලේ පන්දු 41 කදී 4 පහර 8 ක් සමග
කමිදු මෙන්ඩිස් ලකුණු 7 කටත් දසුන් ශාන්ක ලකුණු 6 කටත් දැවී ගියා. වේගවත් ඉනිමක් ක්‍රීඩා කළ පවන් රත්නායක ලකුණු 44 යි. පන්දු 25 කදී ගොඩනැගුණු ඔහුගේ ඉනිමට 4 පහර 3 ක් සහ 6 පහර 2 ක් ඇතුලත්.
ශ්‍රී ලංකා කණ්ඩායම පන්දු වාර 20 ඇතුළත කඩුලු 7 ක් දැවී ලකුණු 178 ක් රැස් කළා. දුනිත් වෙල්ලාලගේ පන්දු 8 කදී නොදැවී ලකුණු 15 යි.
ග්‍රැහැම් ක්‍රිමර් , බ්‍රැඩ් එවන්ස් සහ බ්ලෙසින් මුසරබානි අතර කඩුලු 2 බැගින් බෙදී ගියා.
තරගය ජය ගැනීම සදහා ලකුණු 179 ක ඉලක්කයක් සමග සිම්බාබ්වේ ඉනිම ආරම්භ කලේ බ්‍රයන් බෙනට් සහ තඩිවනාශේ මරුමානි. ඔවුන් දෙදෙනා ආරම්භක කඩුල්ල්ට ගොඩනැගූ සබධතාව ලකුණු 69 ක්.
තඩිවනාශේ මරුමානි පළමු කඩුල්ල ලෙස ලකුණු 34 ක‌ට දැවී ගියා. රයන් බර්ල් පන්දු 12 කදී ලකුණු 23 ක් රැස් කළා. පන්දු 26 කදී ලකුණු 45 ක් රැස්කළ සිකන්දර් රාසා දැවී ගියේ සිම්බාබ්වේ ඉනිමේ 3 වැනි කඩුල්ල ලෙසයි.
ටෂින්ගා මුසෙකිවා එක් ලකුණකට දැවී ගියේ දසුන් ශාන්කගේ පන්දුවක් විශිෂ්ඨ උඩ පන්දු රැකීම හමුවේයි.
සිම්බාබ්වේ කණ්ඩායම තරගය ජය ගත්තේ පන්දු වාර 19 යි පන්දු 3 කදී කඩුලු 4 ක් දැවී ලකුණු 182 ක් රැස් කරමින්. බ්‍රයන් බෙනට් නොදැවී ලකුණු 63 ක් රැස් කළා.
ශ්‍රී ලංකා කණ්ඩායම මෙවර තරගාවලියේදී පරාජය වූ පලමු තරගය මෙයයි.
සුපිරි කණ්ඩායම් 8 වටය යටතේ ශ්‍රී ලංකා කණ්ඩායම සහභාගී වන පළමු තරගය ලබන 22 වැනිදා එංගලන්ත කණ්ඩායම සමග පල්ලෙකැලේ අන්තර් ජාතික ක්‍රිකට් ක්‍රීඩාංගණයේදී පැවැත්වීමට නියමිතයි.
