වයස අවුරුදු 19න් පහළ එක්දින ලෝක කුසලානයේ සුපිරි හය වටයේ දකුණු අප්රිකාව හා ශ්රී ලංකාව අතර පැවති තරගය කඩුලු 5කින් ජයගැනීමට ශ්රී ලංකා කණ්ඩායම සමත් වුණා. තරගය පැවැත්වුණේ බුලවායෝ හීදී.
කාසියේ වාසිය දිනා දකුණු අප්රිකාව මුලින් පන්දුවට පහර දුන්නා.
සිය ඉනිමට දකුණු අප්රිකාව කඩුලු 7ක් දැවි ලකුණු 261ක් ලබාගත්තා.
ආරම්භක පිතිකරු ජෝරික් වෑන් ෂැල්වික් ලකුණු116ක් ලබාගත් අතර අද්නාන් ලගදීන් ලකුණු 46ක් ලබාගත්තා.
පන්දු යැවීමේදී ශ්රී ලංකා කණ්ඩායම වෙනුවෙන් විග්නේෂ්වරන් ආකාෂ්ලකුණු 46ට කඩුලු 4ක් දවාගත් අතර කවිජ ගමගේ කඩුලු 2ක් දවාගත්තා.
පිලිතුරු ඉනිම ක්රීඩා කළ ශ්රී ලංකා කණ්ඩායම තවත් පන්දුවාර 4ක් ඉතිරිව තිබියදී කඩුලු 5ක් පමණක් දැවී තරගයේ ජයග්රහණය ලබාගත්තා.
විශිෂ්ට ඉනිමක් ක්රීඩා කළ ආරම්භක පිතිකරු විරාන් චමුදිත පන්දු 94කදී ලකුණු 110ක් ලබාගත්තා. මෙම ලෝක කුසලාන තරගාවලියේදී ඔහු ලබාගත් දෙවන ශතකයයි. ඊට අමතරව සෙනුජ වෙකුණගොඩ ලකුණු 48ක් ලබාගත්තා.
පන්දු යැවීමේදී මයිකල් කෲස්කෑම්ප් හා කෝන් බෝතා කඩුලු 2 බැගින් දවාගත්තා.
මෙම ජයග්රහණයත් සමග ශ්රී ලංකා කණ්ඩායම සුපිරි 6 වටයේ කාණ්ඩ අංක 1 හි දෙවන ස්ථානයට පැමිණියා.
