එංගලන්තය හා ඉන්දියාව අතර ටෙස්ට් තරගාවලියේ අවසන් තරගයේ සිව්වන දිනය ඊයේ නිමා වන විට එංගලන්තය කඩුලු 6ක් දැවී ලකුණු 339ක් ලබා සිටියා.
ඉන්දීය කණ්ඩායම සිය දෙවන ඉනිම තුන්වන දිනයේදී නිමා කළේ එංගලන්තයට ලකුණු 374ක ඉලක්කයක් ලබාදෙමින්.
ඒ අනුව සිව්වන දිනය ආරම්භ කරන විට එංගලන්තය 1 කඩුල්ලක් දැවී ලකුණු 50ක් ලබා සිටියා.
සිව්වන දිනයේ මුල් භාගයේදී ඉන්දියාව ආක්‍රමණශීලී පන්දු යැවීමක නිරත වෙමින් ලකුණු 106ට කඩුලු 3ක් දවාගත්තා.
ඉන්පසුව, ජෝ රූට් සමගින් හැරී බෲක් සිව්වන කඩුල්ලට ලකුණු 195ක සබඳතාවයක් ගොඩනැගූ අතර හැරී බෲක් ලකුණු 111ක් හා රූට් ලකුණු 105ක් ලබාගත්තා.
තේ පානයට තරගය නතර කිරීමට මොහොතකට පෙර ආකාෂ් දීප් බෲක් ගේ කඩුල්ල ලබාගැනීමට සමත් වුණා.
ඉන්පසු ප්‍රසිද් ක්‍රිෂ්ණා පන්දුවාර දෙකක් තුළ තවත් කඩුලු 2ක් දවාගැනීමට සමත් වුණා.
දිනයේ අවසාන භාගයේදි ඇදහැළුණු වර්ෂාව නිසා තරගය නියමිත කාලයට පෙර අවසන් කිරීමට සිදු වුණා.
ඒ වන විට එංගලන්තයට ජයග්‍රහණය සඳහා තවත් ලකුණු 35ක් හා ඉන්දියාවට තවත් කඩුලු 4ක් අවශ්‍යය වී තිබුණා.
ක්‍රිස් වෝක්ස්ගේ අතට සිදුවූ ආබාධය නිසා පිතිකරණයට පැමිණීම අවිනිශ්චිත තත්වයක තිබෙනවා. එසේ වුවහොත් ඉන්දියාවට තරගාවලිය තරග 2-2ක් ලෙස සම කිරීමට අවශ්‍යය වන්නේ කඩුලු 3ක් පමණයි.
දිනය අවසාන ව්න විට පන්දුවට පහර දෙමින් සිටියේ ජෙමී ස්මිත් හා ජෙමී ඕවර්ටන් යුවලයි.
මේ අනුව, අවසාන දිනයේදී ඉතා උණුසුම් තරගයක් දැක බලා ගැනීමට ක්‍රීඩා ලෝලීන්ට අවස්ථාව ලැබෙනු ඇත.
