විස්සයි විස්ස ලෝක කුසලානයේ දකුණු අප්‍රිකාව හා ඇෆ්ගනිස්ථානය අතර පැවති තරගය සුපිරි පන්දුවාර දෙකකට පසුව දකුණු අප්‍රිකාව ජයග්‍රහණය කළා. තරගය පැවතුණේ අහමදාබාද් හීදී.
කාසියේ වාසිය දිනා ප්‍රථමයෙන් පන්දු රැකීමට ඇෆ්ගනිස්ථානය තීරණය කළා. ඒ අනුව දකුණු අප්‍රිකාව පන්දුවාර 20 අවසානයේ කඩුලු 6ට ලකුණු 187ක් රැස්කළා.
රයන් රිකල්ටන් ලකුණු 61ක් හා ක්වින්ටන් ඩිකොක් ලකුණු 59ක් ලබාගත්තා.
ඇෆ්ගනිස්ථානය වෙනුවෙන් අස්මතුල්ලා ඔමර්සායි කඩුලු 3ක් හා රෂීඩ් කාන් කඩුලු 2ක් දවාගත්තා.
පිළිතුරු ඉනිම ක්‍රීඩා කළ ඇෆ්ගනිස්ථානයද සියලු දෙනා දැවී ලකුණු 187ක් රැස් කළ අතර තරගය සමවුණා.
ඇෆ්ගනිස්තානය වෙනුවෙන් රමනුල්ලා ගුර්බාස් ලකුණු 84ක් ලබාගත්තා.
ඒ අනුව සුපිරි පන්දුවාරයේ මුලින් පන්දුවට පහරදුන් ඇෆ්ගන් කණ්ඩායම ලුන්ගි න්ගිඩිගේ පන්දුවාරයට ලකුණු 17ක් ලබාගත් අතර පිලිතුරු ඉනිම ක්‍රීඩා කළ දකුණු අප්‍රිකාවටද ලබාගත්තේ ලකුණු 17ක් පමණයි. ඒ අනුව තරගයේ තීරණය තවත් සුපිරි පන්දුවාරයක් සඳහා ඇදීගියා. ඇෆ්ගනිස්ථානය වෙනුවෙන් පන්දු යැව්වේ ෆසල්හක් ෆරූකී විසිනුයි.
දෙවන සුපිරි පන්දුවාරයේ මුලින් පන්දුවට පහරදුන් දකුණු අප්‍රිකාව අස්මතුල්ලා ඔමර්සායීගේ පන්දුවාරයට ලකුණු 23ක් ලබාගත්තා. පිලිතුරු ඉනිම ක්‍රීඩා කළ ඇෆ්ගන් කණ්ඩායමට ලබාගැනීමට හැකි වුණේ ලකුණු 19ක් පමණයි. දකුණු අප්‍රිකාව වෙනුවෙන් දෙවන සුපිරි පන්දුවාරය යැව්වේ කේසව් මහරාජ් විසින්.
ඒ අනුව එම තරගය ලකුණු 4කින් දකුණු අප්‍රිකාව ජයගත්තා.
