වයස අවුරුදු 19 න් පහළ ආසියානු කුසලාන එක්දින ක්‍රිකට් තරගාවලියේ අවසන් මහා තරගයට ඉන්දියාව සහ පකිස්තානය සුදුසුකම් ලබා ගත්තා. ඒ, අවසන් පූර්ව තරගයේදී ඇෆ්ගනිස්තානය සහ බංග්ලාදේශ කණ්ඩායම් පරාජය කරමින්.
තරගාවලියේ අවසන් පූර්ව තරග ඊයේ පැවැත්වුණේ, ඕමානයේ අල් අමෙරත්හිදී. පළමු අවසන් පූර්ව තරගය පකිස්තානය සහ බංග්ලාදේශය කණ්ඩායම් අතර පැවැත්වුණා. ඉන් කඩුලු 9 ක ජයක් හිමි කර ගත් පකිස්තාන කණ්ඩායම අවසන් තරගයට සුදුසුදුකම් ලබා ගත්තා.
පළමුවෙන් පන්දුවට පහර දුන් බංග්ලාදේශ කණ්ඩායම පන්දුවාර 31 යි පන්දු 4 කදී සියලුදෙනා දැවී ලකුණු 138 ක් රැස් කළා. ඊට පිළිතුරු ලෙස පකිස්තාන කණ්ඩායම පන්දුවාර 21 යි පන්දු 5 කදී කඩුල්ලක් දැවී ලකුණු 141 ක් රැස් කරමින් තරගය ජය ගත්තා.
දෙවැනි අවසන් පූර්ව තරගය පැවැත්වුණේ, ඉන්දියාව සහ ඇෆ්ගනිස්තාන කණ්ඩායම් අතරයි. එම තරගය කඩුලු 8 කින් ජය ගැනීමට ඉන්දීය කණ්ඩායම සමත් වුණා. පළමුවෙන් පන්දුවට පහර දුන් ඇෆ්ගනිස්තාන කණ්ඩායම පන්දුවාර 50 තුළ කඩුලු 8 ක් දැවී ලකුණු 227 රැස් කළා.
පිළිතුරු ඉනිම ක්‍රීඩා කළ ඉන්දීය කණ්ඩායම පන්දුවාර 36 යි පන්දු 5 කදී කඩුලු 2 ක් පමණක් දැවී ලකුණු 230 ක් රැස් කර ගනිමින් තරගය ජය ගත්තා. ඒ අනුව, අවසන් මහා තරගය ඉන්දියාව සහ පකිස්තාන කණ්ඩායම් අතර හෙට පැවැත්වීමට නියමිතයි.
