2026 පාකිස්තාන් සුපර් ලීග් අවසන් මහා තරගය ඊයේ පැවැත්වුණා. එම තරගය කඩුලු 5කින් ජයගත් පෙෂාවර් සල්මි කණ්ඩායම මෙවර ශූරතාවය හිමිකරගත්තා.
පළමුවෙන් පන්දුවට පහරදුන් හයිදරාබාද් කිංග්ස්මන් කණ්ඩායමට ලබාගැනීමට හැකිවුණේ ලකුණු 129ක් පමණයි. දක්ෂ පන්දු යැවීමක නිරත් වූ ඒරොන් හාඩි සල්මි කණ්ඩායම වෙනුවෙන් ලකුණු 27ට කඩුලු 4ක් දවාගත්තා.
කිංග්ස්මන් කණ්ඩායම වෙනුවෙන් සාර්ථකත්වයක් දැක්වූ එකම පිතිකරු වූයේ සයීම් අයූබ් පමණයි. ඔහු ලකුණු 54ක් ලබාගත්තා. කිංග්ස්මන් කණ්ඩායමේ ග්ලේන් මැක්ස්වෙල් පළමු පන්දුවෙන්ම දැවී ගිය අතර ඉන්පසු පිටියට පිවිසි කුසල් ජනිත් පෙරේරා අවාසනාවන්ත ලෙස ලකුණු 1ක් ලබාසිටියදී දුවද්දී දැවී ගියා.
පිළිතුරු ඉනිම සඳහා පිටියට පිවිසි පෙෂාවර් සල්මි කණ්ඩායමේ බාබර් අසාම් ද ඇතුළුව ආරම්භක කඩුලු 2ම ලකුණු 7ට දැවීගියා. ඉන්පසු තරගාවලිය පුරාම සාර්ථකම පිතිකරු වූ කුසල් මෙන්ඩිස් පිටියට පිවිසි අතර ඔහුට ද ලබාගැනීමට හැකිවුණේ ලකුණු 9ක් පමණයි.
ඒරොන් හාඩි ඉවසිලිවන්තව පන්දුවට පහරදෙමින් සිය කණ්ඩායම ජයග්‍රහණය වෙත රැගෙන ගිය අතර ඔහු නොදැවී ලකුණු 56ක් ලබාගත්තා. හාඩි ට සහය දක්වමින් අබ්දුල් සමාද් ලකුණු 48ක් ලබාගත්තා. කිංග්ස්මන් කණ්ඩායම වෙනුවෙන් මොහොමඩ් අලී කඩුලු 3ක් දවාගත්තා.
තරගයේ 16 වන පන්දු වාරයේදී ජයග්‍රාහී ලකුණ වාර්තා කළ පෙෂාවර් සල්මි කණ්ඩායම දෙවන වරටත් පාකිස්තාන් සුපර් ලීග් ශූරතාවය ජයග්‍රහණය කිරීමට සමත් වුණා.
