19 වන ඉන්දියන් ප්රිමියර් ලීග් තරගාවලියේ අවසන් මහා තරගය අද අහ්මදාබාද් හී නරේන්ද්ර මෝදි ක්රීඩාංගණයේදී පැවැත්වීමට නියමිතයි. තරගය පැවැත්වෙන්නේ රජත් පටිදාර්ගේ නායකත්වයෙන් යුත් රෝයල් චැලේන්ජර්ස් බැංගලෝර් කණ්ඩායම හා ශුබ්මාන් ගිල්ගේ නායකත්වයෙන් යුත් ගුජරාට් ටයිටන්ස් කණ්ඩායම අතර යි.
මෙවර තරගාවලියේ පළමු වටයේදී තරග 70ක් පැවැත්වුණු අතර ප්ලේ ඕෆ් වටයේ තරග 3 සමග තරග 73ක් මේ වන විට පවත්වා අවසන්.
මෙවර කණ්ඩායමක් ලබාගත් වැඩිම ලකුණු සංඛ්යාව වාර්තා කළේ පන්ජාබ් කිංග්ස් කණ්ඩායමයි ඒ කඩුලු 4 ලකුණු 265ක්. එම ලකුණු සංඛ්යාව ලබාගත්තේ දිල්ලි කැපිටල්ස් කණ්ඩායම ලබාගත් ලකුණු 264 හඹාගොසින් වීම විශේෂත්වයක්.
මේ වන විට වැඩිම ලකුණුලාභී පිතිකරුවා ලෙස රැඳී සිටිමින් තැඹිලි වර්ණ හිස්වැස්මට හිමිකම් කියන්නේ තවමත් පහලොස් වියැති වෛභව් සූර්යවංශී යි. ඔහු තරග 16ට ක්රීඩා කොට ලකුණු 776ක් ලබාසිටින අතර ඔහු මේ වන විට හයේ පහර 72ක් එල්ල කොට තිබෙන අතර එය අයිපීඑල් ඉතිහාසයේම පිතිකරුවෙකු විසින් එක් තරගාවලියක් තුළදී ලබාගත් වැඩිම හයේ පහර සංඛ්යාවයි. මීට පෙර මෙම වාර්තාවට හිමිකම් කීවේ ක්රිස් ගේල් විසිනි.
මෙවර තරගාවලියේ මේ වන විට එක් ඉනිමකදී වැඩිම ලකුණු සංඛ්යාවක් රැස් කළ පිතිකරුවා වන්නේ දිල්ලි කැපිටල්ස් කණ්ඩායමේ ලෝකේෂ් රාහුල් ය. ඔහු පන්ජාබ් කිංග්ස් කණ්ඩායමට එරෙහිව පන්දු 112ට නොදැවී ලකුණු 152ක් ලබාගත්තා.
මෙවර වැඩිම කඩුලුලාභියා ලෙස දම් පැහැති හිස්වැසුම දරා සිටින්නේ ගුජරාට් ටයිටන්ස් කණ්ඩායමේ කගීසෝ රබාඩයි. ඔහු කඩුලු 28ක් ලබාගෙන ඇති අතර දෙවන ස්ථානයේ සිටින්නේ කඩුලු 26ක් ලබාගෙන සිටින ආර්සීබී කණ්ඩායමේ බුවනේෂ්වර් කුමාර් ය.
හොදම පිතිකරණ සබඳතාවය ලෙස මේ වන විට වාර්තාවන්නේ දිල්ලි කැපිටල්ස් කණ්ඩායමේ ලෝකේෂ් රාහුල් හා නිතිෂ් රනා අතර දෙවන කඩුල්ල සඳහා ගොඩනැගූ ලකුණු 220ක සබදතාවය යි.
අද අවසන් මහා තරගයේදී තරග කරන ආර්සීබී කණ්ඩායම අවසන් තරගයට පැමිණෙන විට තරග 15ක් ක්රීඩා කොට ඉන් තරග 10ක් ජයගෙන ඇති අතර ගුජරාට් ටයිටන්ස් කණ්ඩායම තරග 16ක් ක්රීඩා කොට තරග 10ක් ජයගෙන ඇත.
ඒ අනුව කණ්ඩායම් දෙකම ඉතා ප්රභල ස්ථානයක රැඳී සිටින අතර අද අවසන් මහා තරගයේදී ඉතා උණුසුම් තරගයක් දැක බලා ගැනීමට හැකි වනු ඇත. තරගය ආරම්භවන්නේ පස්වරු 7.30ට යි.
