2026 Aichi–Nagoya ආසියානු ක්‍රීඩා උළෙලට සහභාගී වන ශ්‍රී ලංකා කණ්ඩායමේ නිල ඇඳුම් කට්ටලය, නිල ඇඳුම් අනුග්‍රාහකයා වන MAS Holdings සමාගම විසින් නිකුත් කර තිබෙනවා.
කොළඹ ක්‍රීඩා අමාත්‍යාංශයේ ඩන්කන් වයිට් ශ්‍රවණාගාරයේ පැවැත්වුණු උත්සවයකදී තමයි මේ ඇඳුම් කට්ටල ජාතික ඔලිම්පික් කමිටුව වෙත නිල වශයෙන් බාර දීලා තියෙන්නේ. මෙවර ක්‍රීඩා උළෙල 2026 සැප්තැම්බර් 19 සිට ඔක්තෝබර් 4 දක්වා ජපානයේදී පැවැත්වෙනවා.
ක්‍රීඩක ක්‍රීඩිකාවන්ගේ ගමන් බිමන්, පුහුණුවීම්, තරග සහ ජයග්‍රාහී පීඨිකාවන් (Podium) සඳහා වෙන වෙනම Casual, Travel, Podium සහ Performance කියන ඇඳුම් කට්ටල 4 නිර්මාණය කොට ඇති අතර මලල ක්‍රීඩා, ක්‍රිකට්, බැඩ්මින්ටන්, බොක්සිං, රග්බි, මේස පන්දු ඇතුළු ක්‍රීඩා ඉසව් 20ක ක්‍රීඩකයන්ගේ අවශ්‍යතාවලට උචිත ආකාරයට මේවා නිපදවා ඇත.
ශ්‍රී ලංකාව වටා තියෙන මුහුදු රළ සහ සාගර ප්‍රවාහයන්ගේ ශක්තිය, වේගය සහ නොපසුබට උත්සාහය පදනම් කරගෙන තමයි මේ මෝස්තර නිර්මාණය කොට තිබීම විශේෂත්වයක්.
MAS Holdings හි ප්‍රධානීන් සඳහන් කරන්නේ ජාත්‍යන්තර මට්ටමේ නිෂ්පාදන තාක්ෂණය යොදාගනිමින් ශ්‍රී ලාංකික ක්‍රීඩක ක්‍රීඩිකාවන් වෙනුවෙන් උපරිම සහයෝගය ලබාදීමට ලැබීම විශාල ගෞරවයක් බවයි.
